2050/2023-2024

Hnahthial the 28th September 2023: Health & Family Welfare Minister leh South Tuipui AC Bialtu MLA ni bawk Dr R Lalthangliana chuan vawiin khan Horeb Conference Hall-ah Hnahthial District Village Council Association (HDVCA) Conference chu Khuallian niin a hmanpui a, District Bawrhsap Pu Chuauhnuna chu Khualzahawm niin Pu F Laldinthara HDVCA President chuan he hun hi a kaihruai a ni.

Khuallian Dr R Lalthangliana chuan Hnahthial District Village Council Association Conference hman theih a ni chu lawmawm a tih thu a sawi a, VC member kalkhawmte chu chibai bukin an kal lehzelna turah duhsak a hlan nghal a ni.

Khuallian chuan August Ni 15 2019 atanga District anga a function tak hnuah Hnahthial chuan hmasawnna nasa tan a hmu a ti a, District in a ken tel office tam tak hawn tawh niin District thar 3 zingah DC office building hawng hmasa ber an nih bakah District Treasury Office, DVO, Horticulture Office, DUDO, DRDO, DCSO leh office dang tam tak hawn a ni ta chu ropui a tih thu a sawi. District Institute of Education & Training (DIET) te, Rawpui a Kendriya Vidyalaya Sangathan (KVS), zirlai naupang ten a thlawn veka lehkha an zirna hmun tur te pawh ruahman a nih thu tarlangin hmasawnna lungphum pawimawh tak a ni, a ti. Office la hawn loh langsar zual chu District Transport Office leh District Local Administrative Office a ni a ti a, hawn thuai a nih theih nan hmalak mek a nih thu a sawi bawk. Covid hripui chuan kum 2 dawn hnathawh a tih thuanawp bakah harsatna hrang hrang lirnghing, vawk hri, ramri buai, raltlan leh thil đang tam tak a awm thu sawiin chung karah pawh chuan theihtawpin hma an la mek tih a sawi. District hmasawnna tur ruahmanna awmte chu a phurawm hle tiin Tuipui D a cheng nuai 9100 a lei dawh tur pawh thawh tan thuai a nih dawn thu a sawi bawk a , District in a ken tel sub-division office hrang hrang pawh ruahman zel a ni dawn a ti bawk . Nimin maia Cabinet in a pass tak Lumpsum leh Aided school tam tak sorkar sikul a hlankai ni ta pawh tarlangin thil chhinchhiahtlak tak leh lawmawm tak a ni a ti. Minister Dr R Lalthangliana chuan VC te chu an pawimawh hle tiin sawrkar kutke pawimawh tak an ni a ti a. Sawrkar in dan leh dun a nei a, chumi dan hmanga uluk taka inthlang an ni tiin village level-ah an pawimawh hle a ti. Mipui vantlang nena inngheng hnai ber an ni tiin an harsatna leh an mamawh hretute chu VC an ni a, an hnathawh chu pawimawh hlein an mawhphurna pawh a sang hle a ti bawk a, rinawmna leh ram hmangaihna tak tak nen thawk chhunzawm zel tura chahin duhsakna a hlan nghal bawk a ni.

Khualzahawm District Bawrhsap Pu Chuauhnuna pawhin he hunah hian thu sawiin VC member kalkhawm zawng zawngte chibai a buk a, an hmalakna tur hrang hrangah theihtawp chhuah a, mipuiten an thlan chhan ang ngeia khawtlang tan thahnem ngai taka an thawh theihnan duhsakna a hlan a ni. Pu Chuauhnuna chuan Village Council tih thumal chu India Danpui (Constitution) ah a chuan tawh loh thu tarlangin Panchayat tih vek a ni tawh a ti a. India sawrkar leh Mizoram Inremna thuthlung hmangin Article 371 G chuan Mizo dan hman mekte hman chhunzawm a phalsak tiin Village council Act pawh tun thlengin humhalh a nih phah chu lawmawm a ti hle tih a sawi bawk a ni.

Vawiin Hnahthial District Village Council Association Conference-ah hian Upa R Thanhnuna chuan hunserh a hmang a, Pu FC Lalrinliana HDVCA Secretary chuan inhmelhriattirna neiin HDVCA Vice President Pu PC Vanlalliana chuan lawmthu sawiin hun tawp a khar a ni.

Vawiin hun hi session 3 a then a ni a, chawhnu session-ah General Election neih niin MJA Hnahthial ten an kaihruai a, ruai nen hun hlimawm tak hman ho niin hun tih tawp a ni.