2051/2023-2024

Hnahthial the 29th September 2023: Cheng nuai 43 senga sak District Research Office (DRO) leh staff quarter building Hnahthial Electric veng chu nimin khan Government Hnahthial College auditorium-ah Health & Family Welfare Minister leh South Tuipui AC Bialtu ni bawk Dr R Lalthangliana chuan khuallian niin a hawng a, Pu B Lalrinhlua MPESS, Economics & Statistics Director chuan he hun hi a kaihruai a ni.

Khuallian chuan thu sawiin District thar Hnahthial in DRO office building a nei thei dawn ta chu a lawmpui thu a sawi a. Department changtu Chief Minister leh a hlawhtlin theih nana hmalatu Department Officer-te chungah lawmthu a sawi bawk. Khuallian Dr R Lalthangliana chuan District anga a function tak hnuah Hnahthial chuan hmasawnna nasa tan a hmu tiin District in a ken tel office tam tak hawn a ni tawh a ti a. District thar 3 zingah DC Office building thar hawng hmasa ber an nih bakah District Treasury Office, DVO, Horticulture Office, DUDO, DRDO, DCSO leh a dang tam tak hawn takte tarlangin lawmawm a tih thu a sawi. District Institute of Education & Training (DIET) te, Rawpui-a Kendriya Vidyalaya Sangathan(KVS), zirlai naupang ten a thlawn veka lehkha an zirna hmun tur ruahman a nih thu te, District Hospital sakna tur approval hmuh a nih tawh thu te leh Circuit house pawh sak thuai a nih dawn thu tarlangin chung hmasawnna te chu District thar in a ken tel a ni a ti a, lungphum pawimawh tak a ni a ti. Office la hawn loh langsar zual chu District Transport Office leh District Local Administration Office a ni a ti a, hawn thuai a nih theih nan hmalak mek a nih thu a sawi bawk. Khuallian chuan tum sawrkar chu hun khirh leh harsa a tawk nasa tiin Covid Hripui bakah vawk hri, ramri buai, raltlan leh a dang tam tak karah hmasawnna hmel hmuh theih a awm thin chu lawmawm a tih thu a sawi bawk. Mizoram chu India ramah nau piang sangkhat zela nau boral - Infant Mortality Rate (IMR) ah titha ber niin Niti Aayog in a tihchhuah thin Health index-ah pawh pakhatna a nih thu leh Higher Education ah NAAC assessment-ah 83% lai hmuin titha ber a nih thu a tarlang a, lawmawm a tih hle thu a sawi bawk a ni. Minister chuan DRO chu a pawimawh hle tiin sawrkar Department pawimawh zawng zawng tên data rintlak an hmuhna,planning an siam dawn pawha an rinrawl ber a ni a ti a, an data ring chuan ruahmanna siam thin a nih thu sawiin an hnathawh chu ram hnuk khawih a nih thu hre reng tura chahin theihtawpa thawk zel turin a chah a ni.

Hnahthial District Bawrhsap Pu Chuauhnuna pawhin thu sawiin DRO office building hawn a ni ta chu Hnahthial District tan a lawmawm hle a ti a. District Hmasawnna turah statistic rintlak chu a pawimawh hle tiin Statistic tha lehzual neih theih nan office hawn a ni ta chu lawmawm a tih thu a sawi. Department hrang hrang project hlawhtlinna chu thui tak an kutah a innghah thu tarlangin an pawimawhna hre fo turin a chah a, Tangkai taka chhawr turin mipuite leh Department đangte pawh chahin statistic mamawh an neih zung zung theih nan râwn nachang hre thin tur turin a chah bawk.

Hun kaihruaitu Pu B Lalrinhlua chuan khuhhawnna thu a sawi a, BCM Hnahthial North Bialtu Pastor Vanlalzuia chuan hunserh hmangin Deputy Director Pu VL Nghahmawia chuan lawmthu sawiin hun a khar a ni.