787/2023-2024

Khawzawl, the 13th June, 2023: Deputy Chief Minister Pu Tawnluia chuan vawiin chawhnu dar 1 khan khan Khawzawl Electric Veng PHED Complex-ah Mizoram Sawrkar hnuaia Interlocking Polypropylene (PP) Tiles hmanga Basketball Court siam hmasa ber, Khawzawl Basketball Court chu khuallian niin a hawng.

Khuallian Deputy Chief Minister Pu Tawnluia chuan Mizoram sawrkarin hmanraw tha tak hmanga Basketball Court puitling Khawzawla a siam leh hman theiha hawn a ni ta chu lawmawm a tih thu a sawi a. Court siamna hmun chu PHE Department-in pipe chhekkhawlna hmun atana an lo hman tawh thin thu sawiin, thalaite infiamna hmun atana hman tangkai a ni chhunzawm ta chu lawmawm a tih thu a sawi a. UD&PA kaltlangin Khawzawlah infiamna ruhrel hrang hrang siam a nih thu sawiin, Mualvawm Field Artificial turf phah te, Khawzawl Dinthar venga Artificial turf Volleyball Court siam te, PWD Complex-a Tennis Court tuaihnum te leh Khawzawl Vengthara Mizoram pum huap thleng zo Badminton Court siam a nih thute a tarlang a ni.

Pu Tawnluia chuan an hun leh tha senga PP Tiles Basketball Court hawnnaa tel zawng zawngte chungah lawmthu sawiin, Basketball Court thar tha tak chu Khawzawl thalaite'n tangkai taka an hman beiseiin duhsakna a hlan a. PP Tile phah Basketball Court Mizorama nei hmasa ber an ni chu a lawmpui thu sawiin, hei hi Khawzawl mipuite tana infiamna huanga hmasawnna ropui tak a ni, a ti a. A siamna tur ram petu PHE Department chungah lawmthu sawiin, inkhel turte pawh Department tana hnawksaka awm lo turin a chah a. Thalaite chu ruihhlo leh a kaihhnawih laka fihlim tum tur leh, taksa hriselna dah pawimawh hmasa fo thin turin a fuih a. Basketball Court thar hawn fel tak chuan rilru leh taksa hriselna thalaiteah a thlen ngei a beisei thu a sawi a. Neitu nihna thinlung nena enkawl zui zel a tul dawn thu pawh sawiin, tangkai taka hman a nih theih nana duhsakna hlanin a hawng a ni.

Thusawitu dang Khawzawl District Bawrhsap Pu K.Lalrohlua chuan Khawzawl District-in hmasawnna hmel thar tam tak a hmu chu lawmawm a tih thu sawiin, bialtu MLA, Deputy Chief Minister ni bawk hmalakna zara hmasawnna ruhrel hrang hrang siam a ni chu lawmawm a tih thu a sawi bawk a. Sawrkarin hmasawnna ruhrel pawimawh leh tha tak tak a siamte enkawlzui kawngah mipuite chu theihtawp chhuah tur leh dim thiam turin a chah a ni.

Technical report petu Pu C.Malsawma, EE, UD&PA Department tarlan danin PP Tiles Basketball Court hi UD&PA Department kaltlangin Rs 38,00,000/- senga siam a ni a. Khawzawl Basketball Court hi Mizoram Sawrkarin outdoor-a PP Tile Basketball Court a siam hmasak ber niin, Court zau zawng hi a dung metre leh a vang zawng metre 15 a zau a ni a, Ground phaha hmanraw hman hi PP tiles niin FIBA approved thlap a ni a. PP Tiles quality hi a tha ber chi thlan niin, court hi tui tling theilo tura design a ni a. Tile leh cement inkarah tui a tling theih dawn loh avangin infiammite tan harsatna a awm dawn lo a ni.

Hawnna inkhawm hi Pu Malsawmzuala Jt. Director (A), UD&PA Department chuan a kaihruai a, Rev. R.Lalthlengliana'n hunserh a hmang a. Hawnn neih hnu hian Govt. High School Khawzawl leh PES Khawzawl te'n exhibition match hmuhnawm tak an khel a. Pu Lalmuansanga, Khawzawl District Basketball Association President-in lawmthu sawiin hun hman hi a khar a ni.

Deputy Chief Minister Pu Tawnluia hian vawiin vek khan Khawzawl DC Office sak mek a tlawh a; hnathawktute/Contractor-te chuan kumin July thla chhunga zawh hman an tum thu an lo hrilh a. Heng bakah hian Zaingen venga DUDO Office sak mek leh Mualvawm Field bula Futsal Ground sakna turte tlawhin a enfiah nghal bawk.