788/2023-2024

Aizawl, 13th June, 2023: Chief Minister Pu Zoramthanga chuan vawiin khan Justice Sandeep Mehta, Gauhati High Court Chief Justice hovin High Court building, MINECO a sak chu a hmunah a huhova enfiahna (joint inspection) an nei. Law & Judicial Minister Pu T.J Lalnuntluanga, Justice Michael Zothankhuma, Justice Marli Vankung, Chief Secretary Dr. Renu Sharma bakah state sawrkar leh judiciary a hotu dangte'n an tawiawm a ni.

Chief Minister chuan Gauhati High Court Chief Justice in Mizoram a rawn tlawh chu lawmawm tiin, High Court building thar chu hawn thuai a nih a tangkai taka hman a beisei thu a sawi a. State sawrkar atanga mamawh te a awm a nih chuan a inhawn reng thu a sawi a ni.

Chief Justice Sandeep Mehta chuan he High Court building sak chungchangah a bulthut atanga a hmawrbawk thlenga Mizoram sawrkarin duhsakna an chan avangin lawmthu a sawi a. Building changtlung tak sak a nih avangin leh sawrkar laipuiin e-compliant tura court system a beisei ang te chu ngaihpawimawh a nih danah te lawmthu a sawi a. Court building chu state dang tan pawh entawntlak tak a nih thu sawiin, hun reilote ah hawn a luah luh thuai a beisei thu a sawi.

PWD engineer-te atangin building sak dan report tawi ngaihthlak a ni a. NLCPR atanga sum Rs. 4624 lakhs hmuh hmanga sak niin, heng bakah hian sum sanction in a ken telloh tul leh mamawh dang hrang hrangte siam nan state sawrkarin SEDP leh sum hnar dang atangin hna thawh a ni bawk a. Chhawng li - basement, ground floor, 1st floor leh 2nd floor awmin, floor area hi 11,612 sq. mt. a ni.

Vawiin joint inspection neihah hian Finance Commissioner, DGP, Planning Secretary, Law & Judicial, PWD, PHED leh sawrkar department dang atangin hotute an tel a ni.