789/2023-2024

June ni 13, 2023: Vawiin khan Mizoram Board of School Education (MBSE), Chaltlang-ah MBSE leh Social Welfare & Tribal Affairs tangkawpte buatsaih High School-a mitdel zirlai naupangte hman tur Braille Textbook semna hun hman a ni.

Hemi hunah hian Pi Sarah Lalengzami Pachuau Secretary, MBSE chuan MBSE in mitdel zirlai naupangte tana braille textbook chungchanga hma a lo lak chhoh dan a tir te atangin kimchang takin a sawi a. MBSE-in Commissioner, Persons with Disabilities leh Mizoram Blind Society te nena inkawmhona an lo neih tawh thu te, National Institute for Empowerment of Persons with Visual Disabilities (NIEPVD), Dehradun an lo thawhpui tawh dan te bakah Pu JH Zoremthanga Chairman, MBSE-in NIEPVD, Dehradun a hmun ngeia a zuk tlawh thu te a sawi a. MBSE Chairman chuan NIEPVD hnuaia awm Central Braille Press thawktute MBSE nena thawh ho dan tur sawipuiin, Mizo naupangten braille textbook leh large print textbook an neih ve theih dan turte a lo sawipui tawh thu te a sawi bawk. Nikum (2022) a mitdel lehkhabu (braille textbook) Higher Secondary zirlai mi panga hnenah School Education Minister-in a office chamber-a a lo hlan tawhte pawh a tarlang a ni.

Tun tuma braille textbook sem hi Tribal Art Centre, Tanhril-a bun Braille Press, Social Welfare & Tribal Affairs hnuaia print vek a ni. MBSE chuan tun Academic Session (2023-24) kal mek atan zirlai naupang zinga mitdel awmzat data la khawm turin Special Blind School, Durtlang leh Integrated School, Kolasib te hrilhin, hemi rual tho hian mit lama harsatna nei, lehkhabu pangngai chhiar thei lo (low vision student) te data pawh district tina DEO-te hnen atangin lak khawm a ni a, an ni tan hian large font print textbook buatsaih tum a ni bawk.

Heng lehkhabu sem te hi Special Blind School, Durtlang atangin Class IX naupang pathum leh Class X naupang pathumin an dawng a. Integrated School, Kolasib atangin Class IX zirlai naupang pakhatin a dawng bawk.

He textbook semna hunah hian Special Blind School, Durtlang te Integrated School, Kolasib te Pi Vanlaldiki Sailo, Commissioner, Persons with Disabilities te bakah MBSE officer te an tel a ni. He braille lehkhabu semna hun hi Pu JH Zoremthanga Chairman, MBSE-in a kaihruai a ni.