1726/2023-2024

Aizawl, the 1st September, 2023: Hman khat daih sarang/polythene (Single Use Plastic), tawih mai thei lo leh leilung ti chhe mektu, mihring leh nungchi hrang hrang tana nghawng tha lo thlentu tihrem tuma UD&PA Department leh Mizoram Taxi Association (MTA) te thawhhona hnuaia buatsaih, hman khat daih sarang thenfai leh hemi kawnga zirtirna hnatlang runpui chu tukin dar 7:00 khan Deputy Chief Minister Pu Tawnluia, UD&PA Department changtu ni bawk chuan Bethlehem Vengthlang Taxi Stand-ah khuallian niin a hawng.

Khuallian Pu Tawnluia chuan mipui pung zelah hnawm a pun ve zel thu leh hnawm sawngbawl kawnga tanlak tlan a ngaih thu sawiin, hetiang lam hawi hnatlang runpui UD&PA Department leh Mizoram Taxi Association tangkawpte'n an buatsaih thei chu lawmawm a tih thu a sawi a. UD&PA kaltlangin faina leh thianghlimna kawnga hmalakna Notified Town 28 ahte kalpui a nih thu sawiin, khawpui vawnfai leh tih thianghlim bakah cheibawl kawnga tulte UD&PA chuan a kutken thin a ni, a ti a. Hmalakna pawimawh tak zingah bawlhhlawh tawih thei leh thei lo thliar hran kalpui a nih thu sawiin, chhungtinte chu in chhung khura bawlhhlawh thliar hran ngai pawimawh theuh turin a sawm a. Bawlhhlawh thliar hrante chu sawngbawl niin, hman nawn leh tihral turte chinfel thin a ni, a ti bawk.

UD&PA Department changtu ni bawk chuan hman khat daih sarang/polythene leh tawih thei mai lote tih rem tumin Sawrkarin hma a lak thu sawiin, sarang hman zawh hnu thehthang mai mai hian leilung tan harsatna siamin hriselna thlengin nghawng a nei a, hei vang hian lakluh, zawrh leh hman kan do tlan a ngai a ni, a ti a. Single Use Plastic hman kawnga hma la turin State Level leh District Level-ahte Committee felfai tak din a nih thu leh hma an lak mek zel thu a sawi bawk a. Hnawm sakhat sawngbawlna Tuirial leh Kolasib-ahte kalpui niin, Aizawl khawpui chhehvel hmun 3 dangahte siam belh tuma hmalak mek a nih thu leh District Hqrs-ahte pawh hmalak mek a nih thu a sawi bawk.

Deputy Chief Minister Pu Tawnluia chuan eizawnna avanga nitina vak kual thin Taxi Driver-te chu faina kawnga midangte zirtirtu leh hman khat daih sarang hmang lo tura midangte kawhhmuhtu tangkai tak an nih theih thu a sawi a. Faina, thianghlimna leh hriselna kawnga mawhphurhnate hlen turin Department mai nilo kan zavaia tanrual a pawimawh a ni, a ti a. Lirthei atanga bawlhhlawh paih mai thin chu thil changkang lo tak a nih thu sawiin, faina chu tun hun mai nilo nunphunga nghet taka lakluha nunpui tlat tur thil a nih thu a sawi bawk.

Vawiin MTA Hnatlang Runpui hi Aizawl khawpui chhunga Taxi Stand 78 te bakah MTA Sub-Hqrs 6 (Lunglei, Kolasib, Serchhip, Mamit, Lawngtlai, Khawzawl) leh Branch 3 (Kawnpui, Lengpui, Thenzawl) ten an huamchhungah theuh an zawm bawk a. MTA Hnatlang Runpui kaltlang hian lirthei atanga bawlhhlawh paih chhuak lo tura inzirtirna Garbage Free Mizoram sticker bel hnatlang, hman khat chauh daih Single Use Plastic hmang lo tura inzirtirna banner tar hnatlang leh Taxi Stand thenfai hnatlangte buatsaih a ni.

Hman khat daih sarang thenfai hnatlang runpui hawnna hun hi Pu K.Lalrinliana, Vice President, MTA chuan kaihruaiin General Secretary Pu Caleb Ralte hnen atangin report ngaihthlak a ni a. Pu Malsawmkima, Asst. Secretary-in lawmthu sawiin hun hman a khar a ni.

He hunah hian Pu K.Vanlalvena, MP (RS), Pu R.Lalawmpuia, President, MTA, Member dangte leh Local Council hotute an tel a. Hun hman zawh hnu hian Deputy Chief Minister chuan Bethlehem Vengthlang Local Council House leh Police Beat Post-te a tlawh bawk.