1727/2023-2024

Aizawl, 01.09.2023: Tukin khan I&PR, LR&S etc. Minister leh Aizawl West II bialtu MLA ni bawk Pu Lalruatkima chuan Vaivakawn Zohnuaia leimin na hmun chu tlawhin, amah tawiawmtu Pu Lalfakzuala Chenkual, Councillor AMC, PWD E-in-C Er. B. Lalawmpuia leh khawtlang hruaitute nen harsatna sutkian theih dan tur te an thlirho.

Vaivakawn Zohnuai kaltlanga Mizoram University Road chu motor te kal tlang theiha laih zau hlek a siam rem dan zawng turin PWD chu a ṭul anga hma la nghal tura tih a ni a. A kaihhnawih dang department PHED, Disaster Management & Rehabilitation leh AMC pawh biak pawh nghal niin an mawhphurhna theuh te ngaihtuah nghal tura tih an ni.

Minister Pu Lalruatkima chuan, "Mizoram University leh FCI Kudam awmna a nih bakah Aizawl West lam mipui tan he kawng tlang lo hian harsatna a siam nasa hle a. Chhiatna thlen belh lo zawng a, motor kal tlang tir leh dan zawn hi a ṭul hle a ni" tiin helai kawng chungchang hi a sawi a. Chutihrual chuan lei hi a la tawlh a, a la che mek zel nia a lan avangin ruahmanna nghet leh lian tham siam nghal erawh a harsat thu a sawi.

Minister hian leiminna hmun en zawh hian Hunthar Veng ri, Vaivakawn Hunthar jucntion bul Vaivakawn leh Dawrpui Vengthar inkalpawhna kawng tlahniam a en nghal a. A siamthatna tur sawrkarin ruahmanna a lo ngaihtuah tur thu a sawi.