No.936/2021-2022 

Dated Khawzawl, the 12th June, 2021: Vawiin chawhma dar 10:00 khan Deputy Chief Minister Pu Tawnluia, Tuichang Assembly Constituency bialtu MLA in a bial chhunga AAY leh PHH chhungkaw 3,466 te June thla ration a khulsakna pawisa Rs. 2,72,475/- (Cheng nuaihnih, sing sarih, sanghnih zali leh sawmsarih panga) chu Pu Zothanmawia, Deputy Commissioner, Khawzawl District-in Deputy Chief Minister aiawhte kutah a hlan a, pawisa hi vawiinah vek khan veng/khua hrang hranga Retailer-te hnenah hlan chhawn nghal a ni.

Deputy CM in a bial chhunga chhungkaw harsate ration a khulsakna pawisa hlanna pual DC Conference Hall, Khawzawl Darngawn-a neihah Bawrhsap Pu Zothanmawia chuan Deputy CM in bial mipuite a ngaihven thu leh an tan a inhawng reng thu a sawi a. Covid-19 vangin Khawzawl District-ah lockdown kalpui mek a ni a, lockdown vangin eichawp zawng leh inhlawhfa thin tan eizawn a buaithlakin sum leng vak a tlem phah hle thu tarlangin, hun harsa tak kan tawh mek laia bialtu MLA in kawng hrang hranga tanpuina a rawn pe thin chu lawmawm a tih thu a sawi bawk.

He hun Pu Lalrohlua, Addl DC Khawzawl kaihhruaiah hian Pu Lalnunpuia, Chairman, Khawzawl District Village Council Association leh Pu H.Lalrozama te chuan Deputy CM in Covid-19 first wave lai atangin a bial mipuite tan theihtawp a chhuah thin thu leh, tunhnaia VLTF leh damdawiin a hman tur tanpuina a pek zawh hnu lawkah, chhungkaw harsa zawkte ration buhfai a khulsak leh ta chu lawmawm an tih thu sawiin, Khawzawl District tana theihtawp chhuaha thawktu DC leh a thawhpuite chungah lawmthu an sawi bawk a ni.

Thusawitu dang Pu H. Thuamliana, FCS&CA staff, Khawzawl chuan sawrkar laipuiin AAY leh PHH chhungkuate tana a thlawna buhfai a sem chungchangah hriatthiam loh leh hriat dik tawk loh awm theite tarlangin a sawifiah a. Covid-19 vangin Central Sawrkar chuan ration pangngai bakah AAY leh PHH chhungkaw member pakhat tan kg. 5 zel a thlawnin a pek belh a. Hei hi ration pangngai, AAY chhungkaw pakhatah kg 35 leh PHH chhungkaw member tinah kg 5 nen hriatpawlh loh tur a ni, a ti a. Deputy CM in a khulsak chu Central sawrkarin a thlawna a pekbelh ni lo, ration pangngai zawk a ni tih tarlangin, a dawngtute tan chuan a hlu hle a ni, a ti bawk.

Pu Tawnluia, Deputy CM in June thla ration buhfai a khulsak zat hi AAY chhungkaw 676 tan quintal 236.6 leh PHH chhungkaw 2790 tan quintal 671.65 niin, ration khulna man hi Rs. 2,72,475/- (Cheng nuaihnih, sing sarih, sanghnih zali leh sawmsarih panga) a ni.