No.3547/2021-2022

Aizawl, the 4th January 2022 : Deputy Chief Minister Pu Tawnluia'n vawiin khan Mizoram Upa Pawl (MUP) Durtlang Branch in an pawl building an sak thar Chawlhbuk chu a hawng a, building thar hawnna puala inkhawm Durtlang Multi-purpose Community Hall Auditorium a neih chu a hmanpui nghal bawk a ni.

Deputy Chief Minister Pu Tawnluia chuan Mizoram Upa Pawl chu pawl hlu tak, zahawm tak leh tangkai tak a ni tiin MUP member te chu thalai te, Mizo nun zemawi leh chin dan tha leh thalai ten an hriat lohte chu zirtira, kawngkawh hmutu ni a,finchhuahtu ni turin MUP a chah a. Kum upa chungchang a sawina Deputy Chief Minister chuan tumhmaa kum upa lam sawi nana tawngkam an hman thin tarchhia tih hi tunlai thalai ten an hmang tawh lo hi a lawmawm a, tarchhia kan awm lova upa erawh kan awm a, mihring hi kan thawk theih thleng chuan upa kan ni emaw kan hlu vek a ni, a ti.

Pu Tawnluia chuan MUP Chawlhbuk sak nana CM hmasa ten theihtawp an chhuah te, bialtu MLA leh Councillor ten tanpuina an pek te hi a lawmawm a, hei hian khawtlang tana kan zaa kan tanrualna leh thawhhona a tilang a, Mizo khawtlang hi pumkhat kan nih zia a tilang bawk a ni, a ti. Upa nih vanga lungngaia nun leh hun hmang lo tura MUP member te chu chahin, kei mahni tihlim thei thil kan ngaihven a tul a, kan nun pawt mar tu engemaw buaipui kan neih te hi thil tul tak a ni a, khawtlang tan enge ka la tih theih tih te hi kan ngaituah a ngaiin ka hria, a ti.

Chawlhbuk thar hawnna inkhawm hi Pu Thanchunga, MUP Durtlang Branch President in kaihruaiin Pastor Lalremruata Ralte in hunserh a hmang a. A building awmna hmuna Chawlhbuk hi Rev. Lalhnuna Advisor, MUP Durtlang Branch in Pathian hnenah a hlanna a nei a ni.

Chawlhbuk hi 2018 atanga sak tan niin nuai 16.20 senga sak a ni a. Art & Culture leh UD&PA Department te atang bakah MLA Local Area Development Fund leh Councillor hnen atangin a sakna tur tanpuina sum an dawng a. Vawiin khan Deputy CM in building thar hawn lawmpui nan cheng 10,000 MUP a hlan a ni.

MUP Durtlang Branch ah hian member mi 350 chuang an awm mek a ni.