No.3548/2021-2022

Aizawl, 4th January, 2021 : Vawiin khan Health Minister Dr R. Lalthangliana hovin Health & family Welfare Department official pawimawh ten Mizorama Covid dinhmun thlirhona leh Covid variant thar 'Omicron' lo thleng thei thlir lawkin Secretariat Conference Hall ah meeting pawimawh tak an nei a. Health & Family Welfare Board Vice Chairman Dr. ZR Thiamsanga, MLA pawhin he hun hi a hmanpui a ni.

Meeting ah hian meeting hmasa lama thurel bawhzui dan te thlirlet a ni a, Contact tracing uluk leh nasa zawk a kalpui chungchang te, containment zone puan chungchang te sawiho niin, Central sawrkar atanga Omicron variant hmachhawn dan tur chungchanga hriattirna leh inkaihhruaina lo kalte thlirho a ni bawk. Sample test nasa zawka kalpui leh dan tur sawiho a ni a, Sub-centre tinah RAgT kit dah tura ruahmanna siam tha tih a ni. Thawktu lama harsatna awm thei te tarlan niin a rang lama chinfel dan kawng dap vat tum a ni.

He meeting ah hian tunhnaia Health Department-in hlawhtlinna a hmuhte tarlan a ni a. World Bank, NITI Aayog leh Ministry of Health & Family Welfare in kum tin an tih chhuah thin 'Healthy States, Progressive India, Reports on the Ranks of States and Union Territories, Health Index Round IV 2019-2020' 2021 kum tawpa tih chhuah ah chuan state te zingah Mizoram chu pakhatna a ni. Mizoram chu ram pum state te zingah hian Overall leh Incremental ah pakhatna ve ve kan ni bawk.

Universal Health Coverage Day 2021 denchhena Consultation Workshop December ni 13, 2021 khan The Ashok Hotel, New Delhi ah neih a ni a, 'Azaadi ka Amrit Mahotsav Campaign' neih meka India ram puma state hrang hrang ti thate lawmman pek an ni bawk a. Mizoram chuan India ram states hrang hrang zinga 'Wellness Activities' ah lawmman pathumna a la a, Northeast atanga lawmman la thei awmchhun kan ni a, Dr Eric Zomawia, Mission Director chuan Mizoram aiawhin a dawng a ni.

Health Minister chuan heng hmalakna hrang hrangah Mizoramin kan titha chu thil lawmawm tak a nih thu tarlangin, thawktu zawng zawng inpekna leh thawhhona vang a nih thu leh theihtawp chhuah zel a tul thu a sawi. Meeting ah hian Minister chuan WHO atanga RT-PCR leh RAgT test kit Rs.400 lakh chuang man Mizoramin a dawng chu lawmawm a tih thu a sawi bawk.