No.7078/2020-2021

Vawiin khan Faina kawnga hmalakna kal mek chhunzawmna leh kumthara bul tanna atan Deputy Chief Minister Pu Tawnluia hoin Aizawl khawpui leh Lengpui Airport inkar kawngpui dung, Bawngkawn atanga Phunchawng thleng thenfai Hnatlangpui neih a ni a. He hunah hian UD&PA, AMC, SIPMIU, Aizawl Smart City Ltd, kawngpuiin a paltlang Local Council huam chhunga mi te, tlawmngai pawl Clean & Green Revolution leh Chanchinbumite chu kawngdunga bawlhhlawh te senghawiin an hnatlang a ni.

Ch.Saprawnga Truck Terminal kawtah Faina Hnatlangpui hawnna Programme tawi buatsaih a ni a. He hunah hian Deputy Chief Minister Pu Tawnluia chuan faina, hmasawnna leh hriselna te chu an inkungkaih vek avangin faina kawngah thapui thawh chhunzawm a ni dawn a. Tunah hian sawrkar leh mipuite thawhhona avangin pawnlama zun leh ek thiar awmlohna state "ODF State" kan ni mek a. Hun reiloteah India rama State fai ber pawl leh "Open Defecation Free Plus State" nih kan tum a ni, a ti. 

Deputy Chief Minister chuan faina kawngah hlawhtling tur chuan a bul tanna chu chhungkuaah a ni a.Chhungkaw tin ten mawhphurhna pawimawh tak kan nei tih a sawi a. "Bawlhhlawh hi  a siamtu chu keimahni kan ni a. A senghawi tur pawh keimahni tho tih kan in hriat thar a ngai a. Hei hi chhungkua atanga kan inzirtir thar leh theuh a ngai a. Fai leh bawlhhlawh senghawi kawnga hmasawn hi kan rilrua kan tuh ngheh a pawimawh ber a ni. Sum tam tak senga sawrkarin faina kawnga hma a lakna hi a ti hlawhtlingtu leh tawiawmtu ni turin chhungkaw tin te, kohhran te leh tlawmngai pawl zawng zawng te kan in ngen nawn leh a ni", a ti. 

Deputy Chief Minister Pu Tawnluia chuan tunah hian Tuirial-ah Bawlhhlawh tawih thei leh tawih theilo sawngbawlna tha taka kalpui mek a nih thu a sawi a. He hmalakna hi chhawr tangkaia, a thawk tute hna thawh ti awlsam zawk turin chhungtin ten in lamah bawlhhlawh thliar hran kan ngaih pawimawh chhunzawm zel a ngai a ti. Mitin ten faina kawngah zirtirna kan ngaih pawimawh chhunzawm a tul tih a sawi a. Faina chungchanga zirtirna kawngpui dunga sign board tam taka tar mek te leh khawlaia bawlhhlawh bawm hun te pawh a ti chhetu ni loin a venghimtu kan nih zel a ngai a ni, a ti.

Deputy Chief Minister Pu Tawnluia chuan khawpui hmelhmang lan mawi leh mawi loh thuah kawtchhuah kawngpui dunga awm ten mawhphurhna sang tak an nei tih a sawi a. Airport panna kawngpui dunga awm te pawhin mikhualte mithmuh a Aizawl khawpui lanna mawina thuah te chanvo pawimawh tak an nei a. Faina kawngah theihtawp chhuah zel turin tan an lak a pawh ngai a. Chutiang bawkin he lai kawngpui hmangtu te zawng zawng pawhin kan thlawp a ngai a ni, a ti. 

Pu K.Laldingliana, Municipal Commissioner pawhin thusawiin faina kawngah Mizo ten hma kan sawn thu a sawi a. Hmasawnna tur lai erawh a lam tih sawiin kan thil chin thin tha lo te thlak ngai a la awm nual a ni a ti. 'Bawlhhlawh paih' tih kan rilru a awm hi 'Bawlhhlawh senghawi' tia kan thlak a ngaih thu a sawi a; bawlhhlawh bawm awmlohna hmuna bawlhhlawh siam te pawh bawlhhlawh bawm thlen nachang kan hriat a, lirthei atanga kawngpuia bawlhhlawh theh chhuah mai thin kan chin sim te, luikawra bawlhhlawh paih mai chin sim te leh thildang, chin dan tha zawk dang te pawh kan zir te a la ngai tih a sawi a ni.

Er.Lalrothanga, CEO, Aizawl Smart City Ltd pawhin bawlhhlawh sawngbawl kawnga sawrkar hmalakna leh tan lak ngai lai te a sawi a. Aizawl khawpuia cheng mihring kan tam tawh avangin Bawlhhlawh thenfaina atana sawrkar senso chu a hautak tawh hle tih sawiin mipuiin bawlhlawh senghawi kawngah hma kan sawn nasat a ngaiin tan kan lak nasat a ngai hle a ni a ti a. Bawlhhlawh ti tlem turin kan mamawh tihtlem, kan hmanraw hman nawn leh kan hman tawh loh hmanrua te hmanraw tangkai dangah chantir kan thiam a ngai a ni, a ti.

Report a tarlan dan chuan nikhat chhunga Aizawl khawpui chhunga bawlhhlawh lakkhawm hi  1.35 lakh Kgs a tling deuh ziah a chhut a ni a. Tunah hian AMC chuan bawlhhlawh la khawm turin Lirthei laihawl(MMV)  78 chuang leh Lirthei lian chi (HMV) 78 chuang nitin a hmang thin a. Bawlhhlawh senghawi nan hian kum khatah Rs 6 crore chuang senso a ni anga chhut a ni. Vawiina Aizawl khawpui kawtchhuah langsar lai thenfai hnatlangah hian mi 400 chuang an thawk chhuak a. Group 30 ah in sem darhin hmun 30 ah bawlhhlawh lakkhawm hna an thawk a ni.

Faina Hnatlangpui hawnna inkhawm tawi hi Dr. C.Vanlalramsanga,  Commissioner & Secretary, UD&PA in a kaihruai a. He hunah hian Aizawl West -I bialtu Pu Zothantluanga, MLA leh Aizawl North III bialtu Pu C.Lalmuanpuia, MLA te pawh an tel a. Programme tan tirah Faina Hnatlangpui Thutiam chu Nula Zirsangpuii, Miss Mizoram & Ambassador for SBM(U) kaihruaiin chham rual a ni a. Pu K.Laldingliana, Municipal Commissioner, AMC leh Er.Lalrothanga, CEO, Aizawl Smart City Ltd hnen atangin ngaihthlak a ni a. Pu H.Lianzela, Director, UD&PA chuan lawmthu sawiin huntawp a khar a ni.