No.7079/2020-2021

Vawiin khan Rural Development Minister Pu Lalruatkima’n a pisa-ah RD Secretariat a thawkte Pathian hnena lawmthu sawina leh  Kumthar inhlanna a neihpui.

Minister Pu Lalruatkima chuan hnathawktu zawng zawngte inpekna, thawhrimna leh thahnemngaihnaah lawmthu a sawi a, Pathian awmpuina leh hruaina changin Sawrkar ruahmanna te, Kohhran leh tlawmngai pawl hrang hrangten an tawiawm that avang leh Sawrkar thu leh hla leh tih tur leh tih lo tur te mipuiin an zawm that avang tein Mizoram chu state mal khaia COVID-19 positive neih tlemna ber leh COVID-19 avanga boral tlem ber state a ni thei a,  kan zavaia thawhhona rah a ni tiin lawmthu a sawi a ni. COVID-19 avangin nikumah mitin rilru a buai a, sawrkar pawh engemawchenah a buai hle a, chhuanchham an awm a hlau a, amaherawhchu COVID-19 hrileng kara sawrkar hmalakna chhuanawm tak chu ni 100 inhlawhna hlawhtling taka a kalpui hi a ni a, a ti a. Hemi bakah CSS leh state matching share hmuh that kum niin BADP-ah additional fund hmuh a ni bawk a ni, a ti a. DRDA hnuaia post 92 absorption pawh hun rei tak atanga thawktute lo nghahhlel chu tun kumtharah hian a hlawhtling hman beisei a ni bawk a ni, a ti a. Minister chuan hriatna tih punna-ah tang zualin leh technology changkang zawkin a kenpui te man pha tura tan la zelturin thawktute a fuih thar bawk a. Sawrkar hnathawh chu chanvo hlu tak a ni tih hre thar a, taksa hriselna ti chhe thei lakah fimkhur turin leh hun vawn dik ngai pawimawh zel turin a chah bawk a ni.

He hun hi  Pu Lalhmingthanga, Commissioner & Secretary, RD Department chuan a kaihruai a, Pu V.Lalthangchuanga, LDC chuan Bible chhiarin tawngtaina hun a hmang a ni.