130/20025-2026

Khawzawl, dated 10th April 2025: Vawiin tlai dar 3:30 khan Tuichang bialtu MLA leh Deputy Govt. Chief Whip ni bawk Pu W. Chhuanawma'n Zuchhip hmun hluia ruihhlo ngawlvei enkawlna hmun Chhanchhuahna Home a tlawh.

MLA Pu W. Chhuanawma chuan he hmunah hian thu sawiin home-a lo lut te an fakawm a tih thu a sawi a, huaisen taka kawng tha zawh duh vanga tanpuina zawng ngam an nihna ropui a tih thu a sawi. Ngawlvei enkawl mek te hma lam pan zela nakin hun ngaihtuah tlat turin a chah a, tanpuina an mamawhnaah theih ang angin pui zel a tum thu a sawi bawk a ni. MLA Pu W. Chhuanawma hian Chhanchhuahna Home hnenah table tennis board a pe bawk a ni.

He hun hi Chhanchhuahna Home Speaker Pu Aldrin V. Zomuanthanga'n a kaihruai a, MLA Pu W. Chhuanawma lo kal chu lawmawm an ti takzet a ni tih a hrilh a, mamawhna an neih hrang hrang, fencing tha zawk an mamawh thu te a hrilh bawk. Khawzawl DC Pu K. Vanlalthiana'n thu a sawi bawk a, MLA Pu W. Chhuanawma hnenah home a tlawh avanga lawmthu sawiin enkawl mekte beidawng loa hma lam zawnga ke pen zel turin a chah bawk a ni.