1751/2022-2023
Dated Serchhip, the 30th August, 2022: Vawiin khan Er. Lalrinawma, Tuikum bialtu MLA, Deputy Speaker ni bawk chuan a bial chhung Sialhau khua tlawhin, Buanhmun Handloom Cluster hnuaia puantaha eizawn tumte nen inkawm hona an nei.

Er.Lalrinawma chuan ka bial chhung tana MLA Fund ka hmuh 80% vel zet chu eizawnna lam hawi atan ka hmang thin a. Thil dang ka ngaipawimawh lo nilovin eizawnna hi ka ngaipawimawh zual bik vang a ni. Kan bial chhung khaw hrang hrangte dinhmun thlir kual chungin theihtawpin kan umzui ta thin a ni, a ti. Khumtungah chuan Balhla chin kan uar avangin link road kan ngaipawimawh a, Chhuanthar lamah chuan Furniture lam kan uar thung a, chutiang zelin khaw hrang hrangte mamawh a inang vek lo. Sialhau khaw tan hian Puantaha eizawnna hi a tha ber dawn niin ka hria a, tihian hma ka la zui ta a ni, tiin MLA Fund a hman dan tlangpui leh Sialhau khaw tana Buanhmun Handloom Cluster a kalpui chhan a sawifiah a ni.

Buanhmun Handloom Cluster hnuaiah hian chhungkaw 31 velin bul in tan dawn a, eizawnna tha taka a chan zui zel theih nan nangmahniah thil thui tak a innghat chho dawn a ni. Sialhau khua hi Zoramin puantah ah an hriatzui ngei che u ka beisei dawn a ni. Sawrkarin bul a tanpui ang che u a, a hlawhtlinna chu nangmahni ah a inghat a ni, a ti. Bialtu MLA hmalakna hian puan bânna leh a thilna hmun tur concrete building tha tak an khaw chhungah sak a ni tawh a ni.

Er. Lalrinawma hian puantaha eizawn tum ten zawhna leh hriat belh duh an neih te zawtin inkawm hona an nei zui a ni.

He inkhawm hi Pu Pc Lalduhsanga VCP chenna inah neih niin VCP chuan inkhawm hi a kaihruai a ni.