1750/2022-2023
Thlazing ni 30, 2022: Vawiin khan Mizoram Sawrkar Flagship Programme - Socio-Economic Development Policy (SEDP) hnuaia chhungkaw hmasawnna tinzawna eizawnna ngelghet bul ṭanpuina tur Family Oriented SEDP chu Lawngtlai East Bialtu MLA, Agriculture Development Board Vice Chairman Pu H. Biakzaua chuan Lawngtlai-III-a CYLA Hall-ah Lawngtlai District tan a hawng.
Pu H. Biakzaua chuan Mizoram Sawrkarin tih tum hmachhawp a neihte tam tak a tihlawhtling tawh tih sawiin, tunah chhungkaw eizawnna ngelnghet tinzawn (family oriented)-a Sawrkar flagship programme SEDP kalpui tura bul ṭan chhoh a ni leh ta chu lawmawm a tih thu a sawi a. Lawngtlai District tana hawnna huna mipui ṭhahnem tak an tel chu ropui leh phurawm a tih thu a sawi. Sawrkar Laipui aṭanga Sawrkarin sum a dawn tur a dawn tak loh, a hloh cheng vaibelchhe 3,000 vel zet a awm laiin, COVID-19 hri leng avang te, lirnghing leh khuarel chhiatna avang te, ramri buai avang te, raltlan buaipuinaah te leh ASF avang te'n ruahman lawk lohva sum hman ṭulna Sawrkarin a hmachhawn a, chuti chung chuan hmasawnna hna thawh a chawl chuang lo tih sawiin, Family Oriented SEDP pawh a tira ruahman angin a tahtawla kalpui chhoh zel tum a ni, a ti. Family Oriented SEDP chu Mizoram pumah beneficiary mi 60,000 hnenah 1st instalment pe chhuak phawt tura ruahman a nih thu sawiin, assembly constituency tinah beneficiary 1,500 ṭheuh an awm tih a sawi a. Lawngtlai District chhunga SEDP beneficiary-te chu tih tak takna nena bul ṭan tur leh a hlawhtlin ngei theih nana theihtawp chhuah turin a chah nghal a ni.
Pu H. Biakzaua hian Village Level SEDP Committee te inrelbawlna tur (admin cost) chu Lawngtlai District chhunga assembly constituency pathum aṭanga VLC thlan chhuah 3 ṭheuh hnenah cheque-in a hlan nghal a. VLC tin hian beneficiary an ngah dan azirin beneficiary pakhatah ₹ 300/- zel hisapin admin cost hi an dawng vek dawn a. Khuallianin a sem bak hi vawiin vek khan DC Office aṭangin VLC tinin an lak nghal theih turin ruahmanna siam a ni a, vawiin atan bik Mizoram Rural Bank (MRB) chuan hemi pual hian Lawngtlai DC office-ah site office an hawng a ni.
He hunah hian Lawngtlai Bawrhsap & District Level SEDP Committee Chairman Pu Amol Srivastava chuan hun hawnna thu sawiin, SEDP thil tum "Mahnia eizawnna bul ṭan nan leh he'ng eizawnna kalpui mekte'n hma an sawn zel nana an hman tur ṭanpuina pek a, Mizoram chhunga mimal leh chhungkua, a tam thei ang ber dinhmun ṭha zawka hlan kai" tih a hlawhtlin nana thawh hopuiah kal khawmte chu a sawm a. DRDA Project Director & District Level SEDP Committee Member Secretary Pi Marilyn Rualzakhumthangi hnen aṭangin technical report ngaihthlak a ni a. Sub-Deputy Commissioner & District Level SEDP Committee Nodal Officer Pu H. Vanlalbiakzaua chuan lawm thu a sawi bawk a. Vawiin hun hmanah hian Government Lawngtlai College-a Assistant Professor Dr C. Lalhmangaihzami chu hun kaihruaitu (compere) a ni.
Vawiina Lawngtlai District tana Family Oriented SEDP launching programme-ah hian Lai Autonomous District Council leh Chakma Autonomous District Council-a Executive Member leh MDC-te, District Level SEDP Committee member-te, head of office-te, District chhung khaw hrang hranga Village Level SEDP Committee member-te leh beneficiary-te, political party ai awhte, tlawmngai pawl ai awhte leh chanchinbu mite an tel a ni.
District Level SEDP Committee Member Secretary Pi Marilyn Rualzakhumthangi report-a tar lan a nih danin, Lawngtlai District chhungah assembly constituency pathum - Tuichawng, Lawngtlai West leh Lawngtlai East te awmin, Tuichawng bialah khaw 88, Lawngtlai West bialah khaw 32 leh Lawngtlai East bialah khaw 67, a vaiin Lawngtlai District chhungah khaw 187 a awm a. Lawngtlai District chhungah hian a pum puiah beneficiary 4,500 awmin, Animal Husbandry & Veterinary Department hnuaiah beneficiary 1,909; Agriculture Department hnuaiah beneficiary 1,640; Commerce & Industries Department hnuaiah beneficiary 329; Land Resources, Soil & Water Conservation Department hnuaiah beneficiary 282; Horticulture Department hnuaiah beneficiary 180; Fisheries Department hnuaiah beneficiary 79; Urban Development & Poverty Alleviation Department hnuaiah beneficiary 58 leh Sericulture Department hnuaiah beneficiary 23 an awm a ni.
Attachment
- Loading attachment...
