862/2022-2023

Dated Serchhip, the 10th June, 2022: Higher Secondary School, Chhiahtlang in HSSLC Exam 2021-2022 a za a za an hlawhtlin lawmna hun vawiin khan buatsaih a ni a, bialtu MLA Er. Lalrinawma, Deputy Speaker chuan khuallian niin a hmanpui.

Khuallian chuan, Chhiahtlang Higher Secondary School in hlawhtlinna duhawm tak an hmu chu lawmpuiin, thawktute leh zirlaite inpekna a fak a. Zirna pawmawhzia naupangte hrilhin, zirnaa hlawhtling turin palen leh patetin awmzia a neih loh thu a sawi a. Tumruhna leh thawhrimna hi hlawhtlinna bul zawk a ni, a ti. Aizawl lama College ah te seat kan chan loh pawh in North East-a college tha ber panga zinga thlan Govt. Serchhip College a awm tih hrereng turin a chah a. An zir chhoh zelnaah thiamna mai bakah nungchang tha leh Zonun zemawi te put zel hi kan hnam dinchhuahna a ni tih zirlaiten i vawng reng ang u, tiin a chah bawk a ni.

Result ṭha lawmna hun hi School Managing Board Chairman Pu. R. Lalremchhunga, VCP Chhiahtlang South in kaihruaiin, Pi Lalawmpuii Ralte, Principal leh Managing Board Secretary in report a pe a.  Pu Lawmawma, DEO Serchhip pawhin thu sawiin, Remtluangpuii, Lecturer in lawmthu sawiin hun a khar ani.

Chhiahtlang Higher Secondary School hi kum 2014 aṭanga din nii, ni 12 May, 2014 aṭang khan Class lak ṭan a ni a. Kum 2017 khan provissional Permission pek an ni. 1.10.2022  khan Lump-sum Grant-in Aid ah hlan kai an ni a. A din tirh aṭang hian HSSLC Exam vawi 8 an hmachhawn tawha, a din tirh kuma zirlai pakhat fail bak tun thlengin fail an la awm lo a ni.