1944/2022-2023
Aizawl, the 15th September 2022 : Mizoram Legislative Assembly Deputy Speaker Er Lalrinawma'n vawiin khan Aijal Club(Cabe Hall) ah Engineers'Day lawmna hun Mizoram Engineering Service Association (MESA) in a vawikhatna atana an buatsaih chu khuallian niin a hmanpui.

Deputy Speaker Er Lalrinawma chuan engineer te chu ram hmasawnna kutkentu ber an nih thusawiin engineer te thiamna tel lovin hmasawnna ruahman leh hnathawh hi a kal thei lova, inkalpawhna, tui, eng leh hmasawnna hna dang tam tak hi an tel lovin a thawh theih loh a ni, a ti a. Science hmanga thiamna a nih avangin a hna hi a zahawm a, chu mai bakah thil ngaihtuah chhuah leh thil hmuchhuah te leh a taka thil tih ngai hna a nih avangin thiamna bakah remhriatna neih hi engineer te tan chuan thil tul leh pawimawh tak a ni tiin a sawi. Engineers’ Day hmang tura kalkhawm engineer te chu ram leh hnam hmasawn nan an thinlung leh ngaihtuahna zawng zawng nen theihtawp chhuahin hna thawk zel turin a fuih a ni.

Programme hi Er. Lalropuia, President, MESA chuan kaihruaiin Er. Benjamin Tlumtea, General Secretary MESA in Engineers' Day tobul leh he ni hmanna chhan, India rama civil mite chawimawina sang ber Bharat Ratna hiala lo chawimawi tawh Sir M Visvesvaraya chanchin sawiin hun a hmang a. Er. Lalmuanzova Secretary, PHE Department in Ethics & Professionalism of Engineers tih thupui hmangin thu a sawi a. Er. Lalrotluanga, CE, I&WRD; Er. C. Lalremsiama E-in-C, PHED; Department leh Er. Bowman, E-in-C, PWD te pawhin an Department hmalakna leh hnathawh te tarlangin thu sawina hun an nei a. Damlohna avanga he hun hmang thei lo Er. F. Lalrinpuia, E-in-C, P&E Department thusawi chhiarchhuah a ni bawk a. MESA member mi 100 chuang Engineering Department 4 a thawk mekte chu he ni lawmnaah an kalkhawm a ni.

Kum 55 kalta khan Sawrkar Laipuiin India engineer hmasa berte zing a mi leh engineer lar tak kum 1860 a piang Sir M Visvesvaraya hnathawh hriatreng nan a piancham September ni 15 chu Engineers' Day a hman a lo rel a. A hnathawh leh a rawngbawlna avangin Sawrkarin 1955 khan M Visvesvaraya hi ram chawimawina sang ber Bharat Ratna a hlan a. Kum 102 mi niin 1962 ah a boral a ni. Tun thlengin a kutkawih leh kutchhuak project hrang hrang te chu sawizui hlawhin hman tangkai mek a ni.

Attachment

  • Loading attachment...