1945/2022-2023
Kolasib dated 15th September 2022: Vawiin chawhnu khan Pu John LT Sanga, Deputy Commissioner, Kolasib district chuan School of Nursing, Thingdawl (SONT) a tlawh a. Nursing zirlaite nen inkawm hona hun hmangin Nursing hna chu inpekna thuk tak ngai hna a nih thu leh midangte tan a malsawmna ni tur a thiamna bik neih a pawimawh thu a sawi.


Mizoram pum a Nursing zirna school, result țha tak nei țhin, School of Nursing, Thingdawl chu Kolasib district tihmingțhatu a nih mek thu Pu John LT Sanga, Deputy Commissioner chuan zirlaite a kawmnaah a sawi a. Zirna a tih țhat piah lam ah Nursing hna an thawh hun a midangte tan a malsawmna ni tur a thiamna hmantlak an neih a pawimawh thu a sawi. Mihring hriselna enkawltu leh dam lo enkawltu an nih dawn avangin thiamna bak ah dawhtheihna leh rintlak an nih a țul bik thu a sawi bawk a ni. Pu John LT Sanga chuan Modern Nursing tih hmasawnna kawng a sulsutu, Florence Nightingale chanchin a entawn tur tam tak awmte chu sawi langin mahni mihringpuite nunna leh hriselna chu thliar bik nei lo a, theihtawp chhuah a enkawl țhin a pawimawh thu a sawi a. Kan hna țheuhte țha tak a kan thawh bak ah min mamawhtute chung a kan chetzia leh țawngkam hman dan hian an taksa leh rilru ah damna nasa tak a thlen phah theih thu a sawi bawk a ni.


SONT zirlaite nena inkawm hona hun hi Pi Melinda Lalhmangaihi, Tutor-in a kaihruai a, Pu C.Liankunga, Vice President, Sub-Headquarters YMA, Kolasibin zirlaite fuihna thu sawiin Pi Lalțanpuii, Principal, SONT chuan Nursing school, Thingdawl chanchin tlangpui tarlanna hun a hmang bawk a ni.


School of Nursing Thingdawl, Kolasib hi Mizoram sawrkar hnuaia GNM School pahnihna ni turin 11 December 2017 khan tan a ni a. Ministry of Health & Family Welfare, Government of India in bultanna tur sum pein Hospital & Medical Education, Health & Family Welfare Department hnuai a awm a ni. Tunah hian zirlai 61 an awm mek a, SONT atang hian zirlai 37 an zir chhuak tawh a ni. Kum 2021 Mizoram Nursing Council Exam, 3rd year Final result-ah khan SONT zirlai atangin Top ten zingah pakhatna, pathumna, palina, parukna leh sawmna dinhmun hauh an awm a ni.

Attachment

  • Loading attachment...