1946/2022-2023

15.09.2022: Vawiin chawhma dar 11:00 khan Sesawnga Ripening Chamber 2 (pahnih) chu Pu K. Lalthawmmawia, Secretary, Horticulture Department leh Dr. Elizabeth Saipari, Director of Horticulture ten an hawng.

Sesawng VC-II a Ripening Chamber a hawnnaah khuallian Pu K. Lalthawmmawia chuan thu sawiin, he hmalakna hian beiseina sang tak siam in, thei leh thlai tharchhuahah chona thar a pek thu a sawi a. He laia khaw neituten theihtawp an chhuahna chuan rah duhawm tak a hrin chhoh mek thu sawiin, hlawhtling ngei turin duhsakna a hlan a. Cluster approach a Balhla an lo ching thin chuan hmalakna a awlsam phah thu leh chin zui zel tlak a nih thu a sawi.

Ripening Chamber 2 (pahnih) hawn a nih hnu hian Sesawng chuan Ripening Chamber 3 (pathum) an lo neih tak avangin balhhla khawpui a tih theih khawp a balhla hmunpui a nih a duhsak thu a sawi a. An hnathawh rah leh an taimakna in a hrinchhuah a nih thu sawiin, balhla um nan hian damdawi (Carbide) hman phal loh chi reng reng hmang lo tur leh Ripening Chamber hi uluk tak leh a tangkai thei ang bera hmang a, hmasawnna rah duhawm tak nei turin a duhsakna a hlan a ni.

Dr. Elizabeth Saipari, Director of Horticulture pawhin Sesawnga VC-I a Ripening Chamber a hawnnaah chuan Mizorama Balhla ching tha ber zing a mi Sesawng khua Ripening Chamber an nei chu a lawmpui thu a sawi a. Chumi rual chuan dimdawi a, tangkai taka hmang thin turin a fuih bawk. Ripening chamber chabi pawh VC I & II te hnenah hlan nghal a ni.

Ripening Chamber hawnna inkhawm hi Horticulture Addl. Director (P) Pu C.H. Lalmuanpuia chuan kaihruaiin, Sesawng VC-I leh VC-II leh department official ten thawhhona thuthlung an ziak a. Horticulture Dy. Director Dr. Lalrinsanga hnen atangin technical report ngaihthlak niin, DHO Pu Lalvangsanga chuan lawmthu sawiin hun a khar a ni.