777/2022-2023
Dated Serchhip, the 4th June, 2022: Nimin dt 3.6.2022 khan Deputy Speaker leh Tuikum Bialtu MLA ni bawk Er.Lalrinawma chuan a bial chhung Ngentiang leh Baktawng khuaa MLA Fund hmanga thawh Helicopter tum hmun tur Helipad a hawng.

Heng Helipad pahnihah te hian Er. Lalrinawma hova Helicopter hi tumpui chhin (trial landing) a nih hnuah a hawnna inkhawm tawi buatsaih zui ve ve a ni a. Er.Lalrinawma chuan, hmasawnna duhawm tak tak a bial leh Mizoram mipuiten an hmuh theih nana tanpuitu Pathian chungah lawmthu a sawi a. Civil Aviation thuneitute thawhpuina te, a bial chhung mipuite inlungrualna te leh an duhsakna duhawm tak tak a dawn thinnaah lawmthu hrilhin, vawiin kan hawn tak Helipad thar pahnih te pawh hi khawtlang hruaitute, NGO te inpekna leh thawh hona tha tak rahchhuak a ni, a ti. Vawiin hi kan bial chhung tana ni chhinchhiah tlak leh hun lawmawm tak a ni, a ti bawk. Helipad hmun tur ram phal taka petute chungah lawmthu ka sawi a, tha taka enkawla, mamawh huna tangkai taka hman theiha a awm reng theih nan a enkawl zui kawngah mipuiten mawhphurhna pawimawh tak an nei tih hrilhin, kan zinna tinah kan hmang reng thei lova nimahsela leilung chhiatna rikrum thilah te, Medical emergency thilah te a tangkai em em a ni tih kan hre reng dawn nia tiin Helipad thar neitu khaw hnih mipuite a chah a ni.

Pu Lalsangpuia, Dy.Controller GAD (Aviation wing) pawhin thu sawiin, Ngentiang leh Baktawng khuain helipad thar tha tak mai an nei thei chu a lawmpui thu sawiin, bialtu MLA fel leh inpezo tak an neih vanga heng hmasawnna te hi nei thei nia a hriat thute a tarlang a. Ngentiang leh Baktawng khawtlang hruaitute leh NGO te inpekna a fak bawk. Aviation hi kan ram tan tun hun leh kan hma lam hun hriltu pawimawh a ni a, sawrkar laipuiin ram mipui zawng zawng te chu tam zawka thlawhna hmang thin turin a duha, a senso lamah pawh 75% hi central sawrkar in a tum thin a, 25% hi state lamin kan tum ve chauh a ni, a ti. Aviation chuan ram chhung hmun kilkhawr zawkte hi theih chin chinah tlawh chhuah theih kan tum a ni, tiin an hmachhawp te a tarlang bawk.

Ngentiang Helipad hawnna inkhawmah hian Pastor Lalthantluanga’n hunserh hmangin, VCP Pu Felix Vanlalfela’n an hmalak dan report pein lawmthusawina a nei a, tlaiah khawtlang huapin ruai an theha, an khaw thenawm atangin mipui tam takin an telpui a ni. Baktawng Helipad hawnaah hian Pastor Lalsawmkima’n hunserh hmangin, VCP Pu Lalrina’n an hnathawh dan report pein lawmthusawina hun a hmang a. Khawtlang mipui thahnem tak telin, sawm bikte pualin zanriah an kilho bawk.