778/2022-2023
Champhai, the 4th June, 2022: World Environment Day, 2022 pualin Champhai Forest Division hnuaia thawkte chuan vawiin khan Botanical Garden, Champhai Zotlang hmunhluiah Mizoram hmun hrang hranga tualto thing chi 27 an phun.

Vawiin World Environment Day pual thingphun hnatlangte hian Herhse, Zuang, Chawmzil, Khawkher, Thinguk, Teipui, Lenhmui, Theitat, Hlingsi, Theifangbar, Zawngtah, Zotlaizawng/Paivun, Lumler, Theichhawl, Ngiau, Tlaizawng, Khuangthli, Lamkhuang, Theivawkmit, Sakhithei, Vau, Archangkawm, Kangtek, Bulpui, Char, Ngaingaw leh Pangkai te an phun a, chi khat zel hi 5 theuh phunin thing phun zawng zawng zat hi 135 a ni.

Champhai Zotlang hmunhluia Botanical Garden lungphum hi June ni 2, khan EF&CC Minister Pu T.J. Lalnuntluanga chuan a phum a, Mizoram a tual tho, thing chi hrang hrang dahkhawmna tur atana ruahman a ni a, zir mi ten an zirna tur atan te, tlawhtu ten Mizoram ramngawa thei rah awm chi ho an ei theih tur te leh par mawi turte an mang mai loh nana vawn thatna atan leh chi chhuaha hmun danga phun darh lehna tur atante a ruahman a ni.

Champhai Zotlang hmunhluia Botanical Garden hi Mizorama hmalak mekna awm chhun niin, tualto thing leh mau bakah State dang amite a tam thei ang ber dah tum a ni a. Interpretation Centre leh Nature Learning Centre pawh siam tum a ni bawk a. Lenkhawthawnna tur hmun, nauban tihpun leh vawnthatna orchidarium, nauban hmun orchid park bakah thing leh mau hrang hrangte phun tum a ni a, zirlai leh zirbingmite tana inzirna tur hmun chhenfakawm tak siam tum a ni.