Vawiin khan Deputy Speaker Er.Lalrinawma chuan a pisa-ah September Ni 25 atanga Ni 27 inkara Parliamentary Processes and Procedures zira Parliamentary Secretariat, New Delhi-a kal I&PR Officers leh MJA  member te kawmna hun a nei a. Training a kalte hian Deputy Speaker hnenah training atanga an zirchhuah hrang hrangte report pein leh Mizoram Assembly House a hman tangkai theihtur thurawn leh sawihona te Deputy Speaker hian a neihpui a ni.

Deputy Speaker Er.Lalrinawma chuan Media chu Democracy ram relbawlnaa ban pawimawh tak Pali-na a ni a, mipuite hnena thu thehdarh hian nghawng thui tak  a nei thei a ni, tiin a sawi a. Parliamentary Procedures chiang zawka zuk zir a ni thei chu lawmawm a ti a, hun chep tak karah Training nei tura hmalatu I&PR Minister of State, Pu Lalruatkima leh Directorate of Information & Public Relations Department hotute hnenah lawm thu a sawi bawk a ni.

Parliamentary Processes and Procedures Training-ah hian Topic hrang hrang 10 zir niin, Parliamentary Complex- Lok Sabha, Rajya Sabha, Central Hall, Parliament Museum, Parliament Library, Press & Public Relations Wing, Lok Sabha TV leh Rajya Sabha TV te tlawh a ni.