Vawiin nileng khan Animal Husbandry and Veterinary Department chuan an hnathawh dan leh hmalakna te thlir hovin review meeting pawimawh tak AH&Vety Polyclinic Conference Hall, Aizawlah an nei a. AH&Vety Minister of State Dr. K.Beichhua chu khuallian a ni.
 
AH&Vety Minister Dr. K.Beichhua chuan thu sawiin Porcine Reproductive and Respiratory Syndrome (PRRS) avangin Mizoram chuan nasa takin a lo tuar tawh thin a, engtinnge Mizoram hi PRRS awmlohna ramah siam a nih theih ang tih chu thawktute rilru kaptu lian ber a ni thin, a ti a. AH&Vety-a thawktute thawhrimna, sawrkar thuneitu hrang hrangte nena thawhhona tha leh mipui thlawpna avangin PRRS outbreak chu tunhnaiah a awm ta lo a, hmun thenkhatah hmuh zauh tur awm thin mahse vantlang tibuai khawpa taidarh nasa kha a tawp ta a, a lawmawm takzet a ni, a ti. Natna hlauhawm tak African Swine Fever chu ram thenawm atangin lo lut thei dinhmunah kan din avangin theihtawp chhuahin sawrkar chuan hma a la a, ram dang atanga vawk lakluh khap a ni a, tun thlenga he natna hian Mizoram a luh loh chhan chu mipui thlawpna tha tak vang a ni, tiin Dr K.Beichhua chuan ram mipui zawng zawng chungah lawmthu a sawi a. Mipuiin a hlauhawmzia an hria a, sawrkara Home Department te, District Administration, Border area-a police awm te, Assam Rifles leh tlawmngai pawlte tawiawmna avangin he hri hlauhawm hian Mizoram a lut lo a ni tih sawiin inthlahdul loa hmalak zel a tul thu a sawi.  Minister of State chuan kan hma lawka hunpui lo thleng tura inbuatsaih nan dan ang thlapa India ram hmun dang atanga vawk note leh vawk ei tur lakluh chu phal a ni tawh dawn tih a puang a. Heng vawk lakluh te hi uluk takin Vairengte-ah endik a ni ang, a ti bawk.

Dr K.Beichhua chuan review meeting hmang tura kal khawm zawng zawngte hlawk taka hun hmang turin a chah a. Department hmalakna hrang hrangte thlir hovin tifuh loh lai an neih siam that te, ngaihtuahna leh tawnhriat inhrilhtawn te, thawhhona boruak tha zawk siam te, chak zawka hmalak theihna tura infuih tawn te chu meeting koh chhan pawimawh tak a ni, a ti.  Minister chuan officer kal khawmte fuihin tih danphung ngai renga kal lovin, ngaihtuahna thar, tha zawk leh fing zawk, ram mipuite tana chhawr nahawm tur ngaihtuah chhuah tum turin a chah bawk.

Vawiin meeting hi AH&Vety Secretary Pu Lalthangpuia Sailo chuan a kaihruai a. Chawhma lamah Joint Director Southern Zone, District AH & Vety Officer te, General Manager te leh IAH &VTI Principal bkah Chief Veterinary Officer ten an hmalakna leh hnathawh dan tlangpui an tarlang a. Chawhnuah Deputy Director (Epidemiology) chuan an Department hmathlir VISION 2023 chu a pharh hnuah, sawihona hun an hmang a. He programme-ah hian AH & Vety Director Dr. Hmarkunga chuan review meeting neih chhan sawiin kalkhawmte inhmelhriattirna hun a hmang bawk a ni.