Lawngtlai District Bawrhsap Pi Shashanka Ala, IAS hma laknaa Lawngtlai District chhunga 'Kan Sikul, Kan Huan' project kalpui mek thawh hnihna (Phase-II) atana thlan sikul leh anganwadi centre-a zirtirtu leh thawktute tan vawiin khan District chhung block hrang hrangah hemi project hnuaia hma lak dan tur inzirtirna (training) buatsaih a ni.

Lawngtlai RD Block huam chhunga mite tana Lawngtlai BNRGSK Hall-a training buatsaih chu Block Development Officer (BDO) Pu Lalremruata Sailo-in hmanpuiin, 'Kan Sikul, Kan Huan' project chu hlawhtling taka kalpui mek a nih thu a sawi a. Zirlai naupangte'n chaw tha an ei theihna tur a nih piah lamah hna thawh an thiam phahna tur leh mahni intodelh tura bul an tanna a nih avangin zirlai naupangte leh zirtirtute'n tha taka an kalpui chhunzawm zel a pawimawh a ni, a ti.

Vawiin training hi Block hrang hrang pali-ah BDO te kaihhruaiin buatsaih a ni a. Soil, Agriculture, Horticulture leh KVK lama mi thiamte’n lei sawngbawl dan, thlai chin dan, enkawl dan leh leitha siam dante an zirtir a. A taka tih chhina (practical) hun buatsaih a nih bakah, thlai chin nana an mamawh tur lei tha pawh sem nghal a ni.

He project hi July ni 13 khan a thawh khatna atan Lawngtlai District chhunga institution 214-ah bul tan a ni a. A tum ber chu bazar-a mi lei ngai lova sikul, anganwadi centre leh naupang enkawlna hmun te’n an mamawh thlai hrisel leh thianghlim an intodelh theih nana an sikul bula thlai hmun siamtir leh chumi kal tlanga naupangte’n an taksa mamawh khawp ei tur tha kum tluana an dawn theihna tur leh mahni intodelh tura hna thawh dan an thiam theih nana zirtir a ni a. Phase-II hi sikul 366 leh anganwadi centre 243, a zavaiin institution 609-ah kalpui leh tur a ni.