Chief Minister chuan vawiin chawhma khan Institute of Advanced Studies in Education (IASE) ah Ph.D. leh M.Phil zirna a hawng. IASE Auditorium, Republic Venga hun hmanah hian Chief Minister chuan Sugamya Bharat Abhiyan hmalakna hnuaia wheelchair hmangte tana IASE building a Lift siam chu a hawng bawk.

Chief Minister Pu Zoramthanga chuan zirna sang zawk neih theihna tura Pd.D leh M.Phil zirna hawn belh a ni leh, pianphunga rualbanlote ngaipawimawh a an tan chet a lo awlsam zawk theihna tura IASE centre a Lift dah thar a ni te chu lawmawm a tih thu a sawi a. Sawrkarin a hmalakna hrang hrang zingah zirna leh hriselna a ngaihpawimawh thu sawiin, hmasawnna tluantling nei tur chuan mihring thiamna leh theihna in hma a sawn tel a tul thu a sawi. Chief Minister chuan zirna chu ei hmu tura mihring buatsaihna piah lamah thiamna tak tak intuh a, mahni inrintawk, mihring hmantlak leh tangkai siamchhuahna ni se a ti. Mizoram hmasawnna turah pawh ramin "asset" tha tak tak a neih, mipui chawm zo ram zau leh tha, sik leh sa nuam, ruahtui thahnem tak neih te hi tangkai taka hmang tur chuan a chhung a cheng mihring ten tumruhna leh thahnemngaihna nen a kan thawh a tul a ni tiin Pu Zoramthanga chuan mithiamte chu ram tihhmasawn kawnga ngaihtuahna seng a, hma lak puiah a sawm.

Vawiin inkhawm hi Higher & Technical Education Department Director Pu R. Zarzosanga chuan kaihruaiin, IASE Principal Prof. Vanlalhruaii chuan IASE chungchang report a pe a. Associate Professor Dr. Laldinliani Hrahsel chuan lawmthu sawiin hun a khar a ni.

Vawiina wheelchair hmangte tana Chief Minister in Lift a hawn tak hi pianphunga rualbanlote tana sawrkar laipui hmalakna, Sugamya Bharat Abhiyan, (Accessible India Campaign tia hriat thin) hnuaiah Social Welfare Department kaltlangin Rs. 41,03,207 senga siam a ni a. He hmalakna hi kum 2015 December ni 3 khan International Day of people with Disabilities ah Prime Minister in tlangzarh in, India pawh signatory ah a tel vena UNCRPD (UN Convention on the Rights of Persons with Disabilities) in Article 9-na a sawi dungzui a siam a ni.

IASE in Ph.D leh M.Phil zirna a hawn tharah hian batch hmasa ber atan Ph.D zirlai 7 leh M.Phil zirlai 4 an awm a ni. IASE hi kum 1975 khan Mizoram Institute of Education (MIE) tia din tan a ni a. Kum 1997 khan College of Teacher Education (CTE) a thlak leh niin kum 2005 khan IASE a hlanchhoh tak niin, kum 2012 March ni 3 khan IASE angin mumal takin a kal tan ta a ni. IASE Mizoram hi India ram puma B.Ed zirtirna Multi-mode programme kalpui awmchhun niin, Tata Institute of Social Sciences, Mumbai in zirchianna a neih ah chuan IASE Aizawl inrelbawlna chu India ram hmun danga IASE tan pawha entawntlak tiin a sawi a ni.