Vawiin khan Chhimveng YMA Hall Mamit-ah Faina Hapta kharna hun hman a ni a. Dr Lalrozama, District Bawrhsap chuan khuallian niin a hmanpui.

Dr Lalrozama chuan Mamit khawpui faina atana Faina Hapta hman chhungin vengtin leh mimal, chhungkaw tinte faina kawnga theihtawpchhuah tura kan inngen anga hmalatu khawtlang hruaitu leh chhungkaw tinte hnenah lawmthu a sawi a. Mamit khawpuiin faina kawnga inelna atana hma nasa taka kan la chungin Mizoram chhung khawpui fai thlanah lawmman kan la pha lo chu chona a ngai a, fai viaua kan inhriat lai hian hmasawnna tur kan la nei a ni tih hria a, hun lokal lehzel tur atana tan min laktirtu nise a duh thu a sawi. Faina chuan hriselna mai bakah kan ram economy thlengin nghawng a nei thei a ni tiin Faina Hapta chhung mai nilo kumtluanin khawpui fai kan nih theihna turin chhungkaw tin leh veng tina khawtlang hruaitute chu a sawm a ni.

Khuallian hian Mamit khawpui chhunga vengfai bera thlan chhuah Luangpawl hnenah chawimawina thuziak leh pawisa fai a hlan nghal bawk.

Pu C. Sawihlira DUDO pawhin thusawiin Faina hapta hman a nih chhunga hmalakna hrang hrangte report a pe a. India ramin Swachh Bharat Mission hnuaiah Clean India Faina kalpui mekah kan ram kan khawpui faina tura mitinte kan pawimawhzia inhre thar turin a fuih bawk a ni.

Faina Hapta hman chhung hian District Level Committee on Cleanliness buatsaihin faina kawnga inelna chi hrang hrang siam a ni a. Lawmman pakhatna atanga pathumna thleng siam a ni a. Heng zingah hian Mamit khawpui veng fai berah Pakhatna Luangpawl niin Pahnihna hi New Mamit an ni a. School leh College faiah hian category hniha then niin Category 1-ah hian Govt Model P/S chu pakhatna niin Category -II ah hian St Francis Of Assisi High School-te chu pakhatna an ni. Office fai berah hian District Child Protection-te chuan lawmman pakhatna an la a. Hotel/Restaurant fai berah hian BM Hotel, Field Vengte chu pakhatna an ni bawk. School leh College naupangte tana buatsaih Essay Writing-ah hian Lalchhanhima Cl-XII, Govt Higher Secondary School chuan lawmman a la a. Song Writer-ah hian Lalnunzira Cl - XII, Govt Higher Secondary School chuan lawmman pakhatna a la bawk. Lawmman hian chawimawina thuziak leh pawisa fai a keng tel a ni.

Faina Hapta kharna hun hi Pu J. Hrangdailova, Chairman Jt VC chuan a kaihruai a, Pi LR Zampuii, Sub Hqrs MHIP President chuan lawmthusawina a nei a. He hunah hian Mamit khawpui chhunga Office hrang hrang, Tlawmngai pawl aiawhte leh Zirlai naupangte an tel a ni.