Vawiin khan Deputy Speaker Pu R.Lalrinawma hovin Mizoram State Sports Council Conference Hall-ah tunhnaia National Rural Competition Group III neih zawh taka medal late lawmpuina hun hman a ni.

1-4 January , 2015 chhung khan Bellary, Karnataka-ah National Rural Competition Group III, RGKA neih a ni a, Under 16 inelnaah hian Mizoram hmeichhe football team an champion a, Judo leh Weightlifting-ah gold medal pakhat ve ve an dawng bawk.

He huna hian Pu R.Lalrinawma Dy. Speaker chu Khuallian niin, Pu C.Laltlanthanga, Secretary, Mizoram State Sports Council chuan a kaihruai a, Pu John Kima, Vice President MSSC bakah official engemawzatin hmanpui bawkin khuallian hian medal latute hnenah lawmpuina thilpek a hlan theuh a ni.

Khuallian Pu R.Lalrinawma chuan, "2015 kum tharah chhiatna rapthlak tak avanga lungngaihnain kan ram min tuam mek laiin kan infiammiten lawmna min rawn thlen a, ram tihmingtha in medal ropui tak nen an lo haw hi a ropui takzet a ni. Kan ram a chhengchhia a, Economics-ah kan la hniam em em bawk a. India rama langpha khawp tur chuan hmabak thui tak kan la nei a ni. Hetih lai hian Sports hmangin India ramah Mizoram hming kan titha thei a, kan thalaite hian talent ropui tak tak an nei a ni. Mizote hi kan duhtawk hmain hlawhtling kan inti hma thin a, hlawhtling tak tak tur chuan teirei peih a ngai a, a bul kan tanna tur chauh a ni tih in hriat reng a pawimawh” tiin medal latute chu a fuih a ni.

Football-ah hian final thlengin Mizoram team-in state 7 an hneh a, match hmasa berah Madhya Pradesh 6-0 a hneh nghalin Chhatisgarh 3-0, Karnataka 1-1, Andra Pradesh 8-0 a paltlangin Pool match an khel zo a ni. Quarter final-ah Haryana nena 2-2 a inhnehtawkin penalty shoot-out hmanga chak zawk zawnnaah 4-3 in an chak a, semifinal-ah Karnataka chu 3-0 a hnehin final an lut. Final-ah hian an hneh loh than Manipur nen intumin 3-1 in an chak a, Rajiv Gandhi Khel Abhyan (RGKA) intihsiak football-ah a vawikhat nan Mizoram an champion ta a ni.

Judo-ah ZD Lalnuntluangi chuan gold medal a dawng a, Vanlalfaka leh Zonunsangi ten bronze medal an dawng ve bawk.

Weighlifting-ah Lalzarmawia chuan 77Kg huangah gold medal a dawng a, Lalrinmawii chuan 53 Kg huangah gold medal a dawng bawk. Moses Lalnuntluanga (56Kg), Gaurav Sunar (69Kg), Lalduhsangi (48Kg) leh Lalthianghlimi (69Kg) ten silver medal an dawng theuh bawk.

Attachment

  • Loading attachment...