Vawiin chawhma khan School Education Department chuan an Conference Hall-ah 60th National School Games a Hockey team champion, Mizoram team player-te leh anmahni hruaitute chawimawina leh lawmpuina hun a buatsaih a. He hunah hian School Education Minister Pu H.Rohluna leh Parliamentary Secretary Pu Joseph Lalhimpuia te pawh telin programme hi School Education Director Pu H.Lalengmawia’n a kaihruai a ni.

Mizoram under 17 Girls Hockey Team ah hian player 15 awm in, Coach Pi Lalrothuami leh Manager Pi Lalfakzuali ten an zu kaihruai a ni. Mizoram under 17 Girls Hockey Team, National School Games a champion te lawmpuina huna thusawitu School Education Minister Pu H.Rohluna chuan Mizoram team in India ram pumpuia thiam ber nihna an hauh leh ta chu Mizoram leh Mizo hnam tana thil lawmawm tak leh hmingthatna a nih thu a sawi a. Tun tuma Champion nomawi hi a tawpna ni lovin Champion no mawi dang tam tak hmahruaitu ni se a duh thu a sawi a ni. Tunhma a Mizo infiammi-te aiin thangthar infiammi ten discipline an nei tha tial tiala a hriat thu sawiin hlawhtling tur chuan insum theihna neih leh taihmak a tul thu a sawi a. Sawrkarin infiammi-te tan khawvel thar a siam mek avangin hlawhtlinna nasa tak Mizoram in a hmu mek a ni a ti. Sawrkar in khelmual tha bakah infiammi-te mamawh tinreng a chhawp chhuak mek a, thalaiten an chhanlet ve na tur chu insumtheihna leh taihmakna nena an thiambik infiamna te lo tihhmasawna an talent te lo peipun ve hi a ni a ti. Zirlai Infiammi-te tan pawh an lehkha zirlai thlahthlam a that loh thu sawiin lehkha thiamna chuan infiammi-te pawh nasa takin a tihmasawn thei zawk a ni a ti.

Thusawitu dang Parliamentary Secretary Pu Joseph Lalhimpuia chuan tun tuma hlawhtlinna leh tunhnaia Mizoram in infiamna khawvela hming a chher chhan chu Chief Minister in a lo sawi tawh thin anga mipui sawrkarin infiammi-te tana khawvel thar a siam sak vang leh Sports Department hotulu ten chak taka hma an lakna rah a ni a ti a. National games hial ah hmeichhe sikul naupang Mizoram aiawha an champion theihna pawh Sports academy-te lo din a nihna in a hrin chhuah a nih piah lamah tanrualna leh thawhhona rah a ni a ti a. Infiammi-te tih phur nana chawimawina tangkafai siam a nih ang hian School Education Minister kaihruaina hnuaiah zirlai titha filawr te tan lawmman siam a ni ve dawn a. He lawmman atan hian tangkafai Rs. 50,000/ leh chawimawina thuziak ruahman chhin a ni a ti.

Mizoram under 17 Girls Hockey Team zu telna National School Games(NSG) hi School naupang ten Sports leh Games-a hma an sawn theihna atan leh hamthatna an neih theihna atana School Games Federation of India (SGFI) in a buatsaih a ni a. Mizoram pawh affiliated member a nih angin kumtin he intihsiakna ah hian a tel ve thin a ni. Sports discipline hrang hrang te hi state hrang hrangin thlengtu an in nih chhawk thin a, tun tum ah pawh Hockey bik hi Jharkhand in thlengin Mizoram team hian final ah a thlengtu state team hi si 3-2 in an hneh a ni. 60th National School Games hi kalpui mek niin tunah hian Football Under-14 (Boys & Girls) Guwahati-ah February thla a khel tur leh Football under-17 (Boys) Kolkata-ah March thla a khel tur te pawh ngawrh takin an inbuatsaih mek a ni. Vawiin lawmpuina programme ah hian School Education Minister Pu H.Rohluna hnen atangin School Education Incentive cash award Rs 5,000/- leh lawmpuina thuziak chu NSG hockey champion team, Mizoram player 15 te hian an dawng theuhva, Coach leh Manager hnenah chawimawina thuziak leh tangkafai Rs.2,000/- ve ve hlan a ni bawk a ni.