549/2023-2024

Aizawl the 23rd May 2023: Deputy Speaker Pu H Biakzaua, Lawngtlai East Assembly Constituency Bialtu MLA ni bawk chuan vawiin khan a bial chhung atanga kumin Higher Secondary School Leaving Certificate (HSSLC) exam-a tithate (Top-10) chu a pisa-ah lawmpuina neiin thilpek a hlan nghal.

Pu H Biakzaua chuan HSSLC exam-a top 10 a lan chu thil awlsam a ni lo tiin hlawhtlinna changte chu an chhuanawm takzet a ni a ti a, a lawmpui hle thu sawiin an zir leh zelna turah duhsakna a hlan nghal a ni.

Deputy Speaker chuan zirna chu hmasawnna bul a ni tiin thiamna tak tak neih a pawimawh a ti a, degree nei satliah a tawk lo a, ram leh hnam tana chhawrtlak; mimal, chhungkua leh khawtlang khaichhuaktu ni tura thiamna tak tak pawchhuaktu ni turin a fuih a ni. Social media hman sual a pawi hle thu sawiin Pu H Biakzaua chuan chin tawk hriat a ngai hle a ti a, tunlai khawvela tangkai em em, a thalo zawnga hman erawh chuan rilru hruai sual thei niin zirna a tibuai thei a ni a ti a, fimkhur taka hmang turin a fuih bawk.

Pu Lalhmahruaia Zote, Commissioner & Secretary, Mizoram Legislative Assembly pawhin fuihna thu sawiin HSSLC pass-te chu an hma hun a intan chho dawn chauh a ni tiin thahnemngai taka zir turin a chah a, an zir leh zelna turah hlawhlinna an chan zel theih nan duhsakna a hlan bawk a ni.

Lawngtlai East AC atanga HSSLC tithate lawmpuina programme-ah hian Pu H Biakzaua chuan hlawhtlinna changte chu lawmpui nan laptop a hlan theuh a. Vawiina zirlai chawimawite chu:

1) Hmingthanzami, 4th position in Science
College veng, Lawngtlai.

2) H. Vanlalrini, 6th position in Commerce
Council veng, Lawngtlai.

3) Ruthi Lalengzuali, 7th position in Arts
Council veng, Lawngtlai te an ni.