550/2023-2024

Aizawl the 23rd May 2023: Vawiin khan Zo Ri-mawi International Charity chuan an din champhaphak lawmna hun Chaltlang High School, Aizawlah an hmang a. Er.Lalrinawma, Social Welfare Minister chu khuallian a ni.

Er.Lalrinawma chuan Mizote hi hmanlai atanga mite tana inpek ngaisang hnam, tlawmngaihna chawisangtu, thian chhan thih ngam hial khawpa midang tana inpezo kan ni a, tlangval te pawh an khaw mipuite himna tur a nih chuan amahni nunna thap ngam hial khawpin an inhlan thin, a ti a. Tunlai khawvelah Mizote chu ringtu kan lo nih hnuin kan zui Isua inpekna entawn chung leh pi pu chena kan rohlu, midangte tana inpekna kan chhawm nung zela, chutiang zul zui zel chuan Zo Ri-mawi International te pawhin chanhai naupangte tana an inpe chu a chhuanawmin a lawmawm tak zet a ni, a ti. Mahni hlawkna um lo a, midangte tana inpe apiang an hlim a, an bula khawsak a nuam thin, Minister chuan a ti a. ZRI te hmalakna chuan naupang engemaw zat nun a tha zawngin a khawih danglam tawh a, naupang dang tam tak tan malsawmna an la nih chhunzawm zel a beisei thu a sawi a ni.

Zo Ri-mawi International Charity pawl hi naupang chanhai, tanpui ngai te tanpui tura din a ni a. School kalna tur nei lo naupang 14 an enkawl mek a. An zing atang hian naupang pangate chuan HSLC an pass tawh a, an zinga pakhat chuan HSSLC a pass chhuak tawh bawk. Charity Awareness chungchang sawizauna hun hmangtu an President Pu Lalrozama Ralte chuan he khawvel damchhung tawite ah hian Lal Isua duhzawng mite tana nun, midangte tanpui, midangte tana malsawmna nih hi kan thupui ber a ni tur a ni a, mahni tan chauha nung tura siam tumah kan awm lo, tiin kalkhawmte a fuih a ni.

Programme hi an Vice President Pi C.Luri’n a kaihruai a. AMC Corporator Pu David Zohmangaiha pawhin thu a sawi a. Pi C.Luri hian keynote address a pe nghal bawk a ni.