551/2023-2024

Aizawl, 23.05.2023: Chief Minister Pu Zoramthanga chuan vawiin khan Aizawl Smart City Ltd. hnuaia Zemabawk playground sak tur chu lungphum a phum. He project hi Zemabawk field tihhmasawnna tur niin, project man hi Rs. 25.66 crores a ni.

Playground lungphum phumna puala Zemabawk Tlangvel Judo hall a inkhawm buatsaihah Chief Minister chuan Zemabawk playground chu Aizawl hmar lama awmte tan chuan infiamna hmun pawimawh tak a nih thu leh, tun hma atanga a siamthatna tur lo ngaihtuah fo tawh a nih dan a sawi a. Smart City hnuaiah beisei phak aia tha tura hmalakna a awm ta chu lawmawm tiin, ruahman anga tha taka thawktute'n an thawh ngei a beisei thu a sawi. Chief MInister chuan sawrkarin sports tihhmasawna kawnga hma a lakna te sawiin, infiamna chu taksa sawizawina satliah mai ni lovin, eizawnna tha leh ngelnghet tak a nih theih zia kan infiammi hlawhtling tak takte atangin kan hmuh thu a sawi a. Sports chu industry a nih zia te, thalai a tui mi leh talent neite'n chutiang kawnga an kal theih nan sawrkar chuan sports infrastructure tha zawk din a, a bulthut (grassroot) atangin thuam tha a hmalak a nih dan a sawi a. Football mai nilo sports discipline hrang hrangah hmalak a nih thu a sawi bawk. Chief Minister chuan sports infrastructure bakah kawng hrang hrangah a remchan dan anga hmalak a nih thu a sawi a. Hun khirh tak tak leh harsatna te awm thin mahse economy in chak zawka hma a sawnna tur kawng a inhawn zel a beisei thu sawiin, hun khirh te a daihrei ngailo a, mi tuhruhte an dairei zawk thin a ti a ni.

He hunah hian AMC Mayor Pu Lalrinenga Sailo chuan thu sawi bawkin, vawiin chu Zemabawk leh Aizawl East-I mipui tan ni chhinchhiahthlak tak nia a hriat thu a sawi a. Hmasawnna hi ngaiah a neih theih thu sawiin, chik taka ngaihtuah thin tan chuan kum 10 chhung te, kum nga chhung chauh pawha Mizoramin hma a sawn nasat dan a sawi a. Aizawl Smart City kaltlanga nasa taka hmalak a nih dante sawiin, state sawrkarin ei leh barah, hmasawnna ruhrel leh kawng dang hrang hranga nasa taka hma a lak dan a sawi a. Hetiang ro tling hmasawnna kan neihte leh din mekte hi mipui lamin hlut nachang kan hriat a dimdawi leh hman tangkai kan tum a pawimawh ve bawk a ni, a ti a. Mizoram chu chhe lailet der anga sawi awm thin chu pawi a tih thu sawi bawkin, hmasawnna leh insiamthat ngaihna erawh chu awm tho mahse state pawn mi te pawhin kan khawtlang nun leh inrelbawl danah entawntlak an rawn tih tam tak kan neih thu a sawi.

Vawiin programme hi UD&PA Secretary Pu Lalmalsawma Pachuau chuan kaihruaiin, Zemabawk Playground hi Aizawl Smart City hnuaia playgorund sak tawh ah chuan a amn a la tam be thu a sawi. CEO Pu C.C. Lalchhuangkima chuan technical report pe in, Zemabawk North GSA Vice Chairman Pu F. Lalramzauva chuan thu sawi bawkin, Zemabawk North Local Council Chairman Pu Lalduhsaka Varte chuan lawmthu sawiin hun a khar a ni.

Zemabawk Playground sak hna atan hian contractor chu M/S Northeast consultancy services (NECS) a ni a. October ni 15, 2023 a zawh tura ruahman niin, tunah hian a laih hna thawk tan mek a ni tawh a. Playground bakah 4-wheeler 45 park theihna leh 2-wheeler 61 park lenna ruahman a nih bakah Gallery pahnih - Mi 1033 thut lenna leh mi 758 thut lenna tur te leh tul dangte ruahman a ni.