552/2023-2024

23.05.2023: Chief Minister Pu Zoramthanga chuan vawiin khan Zemabawk Primary School-I kum 100 a tlin puala monument siam chu a hawng.

Chief Minister chuan Zemabawk a primary school din hmasa berin kum 100 a tling chu ropui a tih thu leh a lawmpui thu a sawi a. Zirtirtute nen inkawmna hun tawite neiin, naupang te kaihhruai kawngah thahnemngai taka thawk zui zel turin a chah a ni.

Zemabawk Primary School-I hi kum 1923 khan din niin, tun dinhmunah zirtirtu 8 leh zirlai naupang 168 an awm a. Vawiin hian Chief Minister hi Centenary Celebration Committee te bakah khawtlang hruaitute leh tlawmngai pawl hruaitute'n an tawiawm a. School centenary lawmna pui chu May ni 25-a la neih tua ruahman a ni.