553/2023-2024

Champhai, the 23rd May, 2023: Mizoram tlawha cham mek Union Minister of State for External Affairs and Culture of India Pi Meenakshi Lekhi chuan vawiin khan Champhai District a thleng a; Champhai, Vangchhia, Zokhawthar, Dilkawn leh Khuangleng khuate tlawhin Sawrkar hmalaknate a enfiah a ni.

Pi Meenakshi Lekhi hian chawhma dar 10:30 khan NH 06 kawng thar zawhin Champhai a thleng a, Circuit House tualah District Bawrhsap Pu James Lalrinchhana, SP Pu Lalrinpuia Varte leh Official dangte'n an lo dawngsawng a ni. Hemi hnu hian Kawtchhuah Ropui Vangchhia tlawhin hmalaknate a enfiah a. Heng bakah hian ramri depa awm Zokhawthar khua tlawhin hmalak dante a enfiah a, Govt. Vengthlang Middle School Champhai, Anganwadi Centre Dilkawn leh Health & Wellness Centre Khuanglengte tlawhin thawktute a kawm bawk.

Amah lawmna pual Vangchhe YMA Library Tuala neihah Union Minister of State for External Affairs & Culture Pi Meenakshi Lekhi chuan Vangchhia chu India ram kawmkil taka awm ni mah se India ram bung pawimawh tak a nih thu tarlangin, India khua leh tui vek kan ni a, in thu thlente pawh theihtawp chhuahin ka bawhzui dawn a ni, a ti a. Hnam ziarang a ngaihsan avanga Mizorama Archaelogical Survey of India (ASI) protected monument hmasa ber Kawtchhuah Ropui Vangchhia tlawh a nih thu leh hemi chauh nilo a dangte pawh haichhuaka ASI protected area a puan a nih zel theih nana hmalak tlan a tul hle a ni, a ti a. Kan hnam chanchin leh ziarangte dik taka tu leh fate hnena  hlan chhawng zel a pawimawh thu sawiin, Vangchhe hmuna ASI hmunah ngawrh lehzuala zirchianna nei tura ngaihtuahna sen a ni, a ti bawk.

Union Minister of State chuan Prime Minister hmalaknain India ramin zalenna kum 75-na a tlin lawmna pualin hnam ziarang chawisan kawngah theihtawp chhuah a nih thu sawiin, zalenna hmuh atanga kum 75-na hnua hmasawnna hrang hrangte ngaihtuah chungin tanlak chhunzawm zel a tul a ni, a ti a. Covid-19 hrileng do kawnga Sawrkar laipui hmalaknate tarlangin, India chuan theihtawp chhuahin khua leh tuite a thlawn vekin ram chhunga siam ngei vaccine leh damdawi mamawhte a pe a, a senso ngai turte pawh Company-te a pe bawk a, ei leh bara harsatna awm theite thlengin a ngaihtuah vek a ni tiin, kan zavaia tanrualna avang chauhin harsatna kan paltlang thei a ni, a ti a. Nakin lawka ram leh hnam innghahna tur thalaite ruihhlo leh a kaihhnawih laka chhanhim a tul tawh takzet thu sawiin, mipuite chu ruihhlo do kawnga theihtawp chhuahpuiah a sawm a. Zirna, hriselna, nu leh naupang enkawlna leh ruihhlo do kawnga hmalakna chu hmasawnna kawnga peng pawimawh hmasa a nih thu a sawi a. Kalkhawmte chu hnam ziarang leh sulhnute, hnam chanchin leh kalphungte zah tlata  humhimtu nih tum turte leh, India ram hmasawnna tura theihtawp chhuah theuh turin a fuih bawk.

District Bawrhsap Pu James Lalrinchhana chuan Champhai District-in khualtha a thleng chu lawmawm tiin, khaw hrang hrang tlawhnaa  khawtlang mipuite khual dawnsawn dan chu fakawm a tih thu a sawi a. Pipu sulhnu hmunhlui pawimawh tak tak awmna Champhai District chu hnam zia leh rohlu vawnhimna kawnga hmun pawimawh tak a nih thu sawiin, mipuite chu ngaihlu thiama vawnghim tlat turin a fuih a. A hun hlu tak senga Champhai District rawn tlawhtu Union Minister of State for External Affairs and Culture Pi Meenakshi Lekhi chungah lawmthu a sawi bawk.

Union Minister of State for Culture Pi Meenakshi Lekhi lawmna puala hun hman hi Khawbung BDO Pu K.Lalhlimpuia chuan kaihruaiin Vangchhe High School Zirlaite'n Cheraw lam mawi tak an entir a. Pu F.Malsawmtluanga, VCP Vangchhia-in lawmthu sawiin hun hman a khar a. Hemi hnu hian Union Minister of State for Culture, a zuitu Official leh khawtlang hruaitute'n Kawtchhuah Ropui leh a chhehvela excavation site-te tlawhin hmalaknate an enfiah nghal a ni.