Vawiin khan Deputy Speaker Pu R. Lalrinawma chuan Weaver’s Service Centre buatsaih Dr. Ambedkar Jayanti Camp , Zuangtui-ah a hmanpui a. He Camp ah hian Bharat Interface for Money (BHIM) app, Bunkar Mitra Helpline, India Handmade Bazaar leh E-Dhaga app te inhrilhriatna leh in zirtirna hun hman a ni.
Pu R. Lalrinawma chuan Mizorama Weaver’s Service Centre din anih chu lawmawm atih thu sawiin vawiina camp buatsaih pawh chuan nghawng tha leh rah tha a chhuah ngei a beisei thu a sawi a. Mizoram-ah handloom leh textile industry chu chak takin hma a sawn zel thu leh Act East policy hnuaiah handloom products te khaw chhak lamah tun aia nasa zawkin hralha thawnchhuah anih a beisei thu a sawi bawk a. Deputy Speaker chuan Technology lama hmasawnna lo thleng zel chu ka thiam ve lo ti lova mahni hna leh eizawnna theuha hmasawnna atan hlawk taka hmang zel zawk tura kalkhawmte chahin vawiina app leh website an zir thar te chu tangkai taka hmang turin a chah nghal bawk a ni.
Bharat Interface for Money (BHIM) app hi phone a download theih niin, cashless transactions( pawisa note hmang lova indawrtawnna) tih theihna ani a, Bunkar Mitra Helpline (Phone: 18002089988) ah hian puan tahtu ten an hriat duh leh mamawhte man chawilovin mithiamte hnenah phone in an zawt thei a ni. India Handmade Bazaar (www.indiahandmadebazaar.com) website hi puan tah tu ten anmahni kutchhuak an zawrha leh pholan theihna hmun a ni a. E-dhaga app hi puan tah tu ten an mobile hmanga la leh puan tahna hmanraw dangte awlsam taka lam khawmna niin, heng apps te hi playstore atanga download theih a ni.
Dr. Ambedkar Jayanti Camp hi Pu S.K Sen ,Assistant Director (WSC) in kaihruaiin, Pu Dibyendu Chaudhuri, Regional Manager SBI in apps leh website chungchang zirtirna hun a hmang a ni.
