3494/2024-2025

Dated Kolasib the 12th December 2024: Vawiin khan Diakkawn YMA Hall , Kolasib ah Govt.C Zakhuma Higher Secondary School chuan an School din champhaphak vawi 25 na Silver Jubilee an hmang a. He hun hi Pu Lalfamkima, Deputy Speaker, Mizoram Legisltive Assembly chuan khuallian niin a hmapui a ni.

Khuallian chuan thu sawiin Govt C Zakhuma High School in kum 25na a thleng chu lawmawm a tih thu a sawi a,he school in a tun dinhmun an din theihna tura tha lo thawh tawh zawngzawngte a lawmpui takzet a ni, a ti. Kolasib a zirna chungchang sawiin, Kolasib chuan zirna lamah hmasawnna tur tamtak a nei a ni, a ti a , Arts leh Commerce mai bakah Government School ina Science Stream an neih ve pawh a pawimawh hle thu a sawi bawk. Zirlai kalkhawmte hnenah fuihna thuchah sawi zuiin, tunlai ah zirlai te rilru hruaipeng thei tamtak a awm a, chung lak atang chuan inven thiam a pawimawh a ni, a ti a. Tunah chuan thian zo ho in awm ho dial dial mahse nakin hunah erawh an dinhmun chu ala dang hle dawn a chuvang chuan tuna an zirlai ah theihtawp an chhuah a ngai a ni, a ti.

Pu Lalfamkima chuan zirlai nih chhung chuan engkim a tawk chin hriat a pawimawh a ni, a ti a. Social media te Sports te nuam hle thin mahse a tawk chin kan hriat loh chuan nakin hunah kan thlen chin tur ata min pawt hniam theitu an ni thei a ni, a ti.  Zirlaite chuan tun hun atang hian kan ram  leh kan economic chungchang te kan vei tan a ngai a ni, a ti a, zirna chu anmahni mimal tan mai ni lovin ram leh hnam humhalhna  a ni tel a ni, a ti bawk. Thusawina a neih zawh hian khuallian hian souvenir tlangzarhna hun a hmang nghal a ni.

Pu Lalnghinglova Chinzah, Principal pawhin thu sawiin kum 25 chhung an zinkawngah harsatna leh bumbohte awm thin mahse vawiin an thleng chu lawmawm a tih thu a sawi a. He School din a nih theihna tura tha leh sum lo thawh tawh zawng zawngte hnenah lawmthu sawiin School chanchin tlangpui report a pe nghal bawk a ni. 

Vawiin a Silver Jubilee hmanna hun hi Pu C Vanlalzawma, Lecturer, GovtC Zakhuma HSS chuan a kaihruaia. Thusawi na he school Principal, Donor Pu C Zakhuma family aiawh leh Principal hmasa ber te atanga ngaihthlak niin, School naupangten zai leh lam entirna hun an hmang bawk . Pu James Vanlalruata, Lecturer, Govt. C Zakhuma HSS in  lawmthu sawina a neih hnuin vawiin Silver Jubilee lawmna hunserh hi tihtawp a ni. 

Govt.C Zakhuma Higher Secondary School hi kum 1999 a din niin kumin hi a kum 25 na a ni a. He School hian Arts leh Commerce Stream neiin Co-Curricular activities engemawzah a awm bawk a, kuminah hian zirlai 299 an nei a ni. An School mamawh zual Deputy Speaker hnena an thlen zingah hian Commerce Stream a Language zirtirtu indaihlohna te leh Science Stream hawn ve ngei ni se tihte a tel a ni. 

He School hi a din tirh chuan PUC leh Secondary kalkawp tir thin a ni a, chutiang a hun rei tak an kal hnu in kum 2005 ah Morning College chu titawp in Higher Secondary pumhlum a leh a ni. 

Kum 2000 ah khan lumpsum aided a dah a ni a, 2008 ah adhoc aided ah dah ni leh in 2018 kum khan Sawrkar  School a hlankai a ni ta a ni.

He School hi mipuiina thahnemngaihna a an din, Sawrkar Higher Secondary School a hlankai tak awmchhun ni a hriat a ni.