3493/2024-2025

Dated Aizawl, the 12th December, 2024: Vawiin khan Govt. Serchhip College Campus ah New Serchhip kum sawmngana lawm a ni a. Bialtu MLA Pu Lalduhoma, Chief Minister chuan khuallian niin a hmanpui. Jubilee lungphun a hawn hnuah Serchhip College Campus-ah a lawmna buatsaih a ni a, Jubilee Souvenir a tlangzarh a, thu a sawi bawk.

Chief Minister chuan, New Serchhip mipuite lawmpuiin khawtlang hruaitu lo ni tawh thin zawng zawng te chungah lawmthu a sawi a. "Kum sawmnga chhungin New Serchhip chu Village Council pahnih leh branch YMA pali ni khawp hialin a thang lian a. Zirna lamah College thuthmun a ni a, sawrkar hmun pawimawh tam tak an awm bawk a. Thang lian zel turin ram rem tak a nei. Heng hi malsawmna a ni. Vawiina khawtlang hruaitute hian kum sawmnga dang lo kal leh tur hmu phaka kan inbuatsaih a tul," a ti.

A thusawi dang te chu:

1. New Serchhip mual te an remin an mawi a, kan enkawl thiam chuan khawpui mawi takah kan chantir thei ang. Kan zir loh erawh chuan ram rem takah khaw nuam lo tak kan siam ve thei bawk. Mizoram lailia awm in ni a, Chief Minister bial in ni bawk a, kawng tinrengah entawn tlakin lo awm tlat ang che u.

2. Kum tela leilung chhiatna a tam tial tial avangin heng chhiatna laka him ngaihtuah chunga in leh lo kan din a ngai. Khaw chhung inkalpawhna kawng te pawh kan ruahman lawk tur a ni.

3. Mi fel pakhat avangin khawtlang kan inchhuang thei a, misual pahnih khat lek hian min tihmingchhe hle thei bawk. YMA leh NGO dang te lo tang ula, a tul ang zela kan Police te nena thawk hovin, khauh takin hma lo la ang che u. Ruihhlo vanga harsatna te hi kan pumpelh vek seng lo a nih pawhin na takin kan nawr tawm tlat tur a ni.

4. Tourism tihhmasawnna kawngah hian hmunhma a neih that avangin Serchhip leh a chhehvel atanga bul tan kan tum a, tunah pawh Paragliding International championship neih mek a ni. Khualzin hip thei kan hmunhma kan neih te duat ila, kan mizia hrim hrim pawh hi midangte hip thei zawnga nun kan tum dawn nia.

5. Khaw tam takin harsatna an tawh chu ‘thliarkar rilru’ hi a ni. Veng bil ringawt te, thler khat ringawt te, veng tepen pakhat ringawt te tana thapui thawha bei duh pawl hi kan lo awm leh mai thin. Hetianga ‘thliarkar rilru’ zim lutuk neih hi hmasawnna daltu a ni. Infrastructure pakhat hian khaw tam tak mamawh min pe thei.

6. New Serchhipah hian handholding chhawr thei mi tam tak rawn chhuak ula, kan veng hi thil siamna hmun, tharchhuahna hmun, production centre tha takah chantir i tum ang u.

7. Zawlpui chhung inkalpawhna te, Kikawn atanga Hmar Veng inkalpawhna lane kawng thar te, Zawlpui atanga Zote kawng te, Paragliding take off kawng te, Mat phase 2 irrigation te, Thenzawl Fodder farm tha zawk te, Thenzawlah vek hian Artui Farm te, Vantawng Rope Way te kan thawk dawn a. Hmawngawn lui chhuah bulah Mat khu khuah kan tuma, Mat kama leilet siam theihna ram te chawm vek thei tuilak neih kan tum. Serchhip hian hmasawnna a hmu zel dawn, tih te an ni.

A lawmna inkhawm hi Pu C. Lalrotluanga, Organising Chairman in a kaihruai a, khawtlang tihmingthatute chawimawina te, Souvenir tlangzarhna te leh jubilee lawmna thil hrang hrang tih a ni.

New Serchhipah hian kum 1974 April thla atang khan Pu Vanlalsiama leh a nupui V. Rosangi te chu an fate pathum nen in sain an awm tan a, an luh kum tawp lam hian chhungkaw pakhat chuan an rawn zawm ve leh a, kum telin an pung chho ta a. 2023 a an inchhiar danin New Serchhipah hian chhungkaw 980 vel, mihring 4500 vel an cheng mek a ni.