2375/2024-2025

Dated Kolasib the 4th October 2024: Vawiin khan Kolasib District Secondary School Sport vawi 20 na kharna programme chu Kolasib Sports Stadium, Project vengah neih niin, he hun hi Pu Lalfamkima,  Deputy Speaker chuan Khuallian niin a hmanpui.

He hunah hian Khuallian Pu Lalfamkima, Deputy Speaker chuan thu sawiin, Kolasib District Secondary Sport vawi 20 na kharna hun hmang thei tur an sawm chu lawmawm a tih thu a sawi a. Sports chu zirlaite tan a tangkai zia sawiin, school a an zir lai ngawr ngawr nilo, an talent dang te pho chhuahna hun a ni, tiin, a District ang zawng pawh a sport lama tan an lak chhoh a ngaih thu a sawi bawk. Hetih rual hian infiamna piahlama an zirlai te ngai pawimawh turin a chah a; zirlai hlawhtling nih a pawimawh thu sawiin, Sawrkar hna a nih kher loh pawh in an zirna chuan changkanna thlenin, anmahni ah nghawng a nei tur a ni, a ti.

Pu Lalfamkima chuan tunah an zir laiin inkawmhlim leh intluktlang dialin awm mahse an thleng thui zel anga, an inthlifim chho tial tial dawn a ni, a ti a. Chuvang chuan taihmakna leh rinawmna nena, an zirlai te hlawhtlinna chang ngei tura an zir a pawimawh a ni, a ti.

Deputy Speaker chuan mahni inthunun a pawimawh thu sawiin; ruihhlo, tunlai Mizoramin a buaipui em em lak a ta inthiarfihlim a, tichhin lo turin a chah a. Tun hnai ah Mizoram chhung ngeiah Thalai mahni nunna lak duhna tam chho ta chu a vei thu sawiin, school naupang kalkhawmte chu huaisen taka an nuna thil thleng te hmachhawn turin a fuih a, chu chuan rilru natna tamtak ata hnehna a pe dawn a ni, a ti. 

Kolasib District Secondary School Sport 2024 hi October ni 1-4, 2024 chhunga neih a ni a. He Sports ahhian School 29 discipline hrang hrang ah inelin, St John Hr Sec School chuan a pumpuiah Lawmman pakhatna an dawng a. Best Girl atan Ruthi Malsawmtluangi,  Govt T Romana HSS chu thlan niin, Best Boy ah Freddy Lalremruata, Govt Vairengte HSS chu thlan a ni bawk. 

Vawiina District Secondary School Sports 2024 kharna hun hi Pu Vanlalchhana,  District Education Officer, Kolasib chuan kaihruaiin, Pu Lalthianghlima, Organizing Secretary in report a pe a. Pu GS Zaithantluang, Vice Chairman, Organizing Committee in lawmthu sawina a neih hnu in closing programme hi tihtawp a ni.