2596/2024-2025

Kolasib Dated the 18th October, 2024: Trained Nurses' Association of India (TNAI), Mizoram Branch-in kum 60 a tlin lawmna chu School of Nursing Thingdawlah TNAI Kolasib District Branch buaisaihin neih a ni. He hun hi Pi Laltanpuii, Principal, School of Nursing Thingdawl chuan kaihruaiin kalkhawmte lawmna hun a hmanga. Deputy Speaker Pu Lalfamkima chuan khuallian niin he hun hi a hmanpui.

Pu Lalfamkima chuan Kolasiba TNAI Mizoram Branch Diamond Jubilee lawmna Programme-a hmun hrang hrang atanga kalkhawmte chibaina hun a hmanga. Nurse hna chu a ropuiin  a zahawm a tih thu a sawia. Nurse-te Isua tihdam rawngbawlna hna chhunzawmtu an nih thu sawiin Bible zirtirna anga mi chaklo leh dam lote hmangaih taka enkawl hna thawk zel turin he huna kalkhawmte hmaah fuihna thu a sawi a. Nurse-te chu chhungtin leh khawtlangin kan mamawh leh thlamuanpui an ni tih hre chunga Nurse hna chu enzawnna nimai ni lovin mipui rawngbawlna lian tak a ni tih hrereng turin a chah bawk. Nursing Profession chu khawvel in a mamawhna a san thu sawiin Nurse hna zir mekte chu Sawrkar hna chauh thlir lova, State pawn leh Foreign-a kal thei tura inbuatsaih thei tur  in Pu Lalfamkima chuan kalkhawmte chu a chah a. TNAI Mizoram chu an kalzelna turah duhsakna a hlan nghal bawk.

Pi C. Lalmuanpuii, Secretary Trained Nurse's Association of India, Kolasib District chuan Central leh State-a Trained Nurse's Association of India dinhmun leh hmalaknate tarlanna hun a nei a. Pi R. Lalremmawii, Chairperson TNAI Kolasib District-in Mizorama TNAI din dan tarlangin TNAI Member-te tana hamthatna awm thei hrang hrangte sawina hun hmangin Nursing Profession chu Mizoramin Export Quality a neih that berte zinga mi a nih thu sawiin TNAI, Mizoram Branch chuan Nurse Profession chawinunga, hmasawnna kawng azawh zel theih nan hma a lak zel tur thu a sawi bawk.

Senior Chief Medical Officer Pu RK. Lalthlamuana pawhin he hunah hian thusawina hun a nei a. Dam lo enkawlna kawngah Doctor-te chu tangkai mahse buaipui ngai leh enkawl zel hna thawktu chu Nurse an ni a, an pawimawhna a sang hle a ni, a ti a. Medical lamah Mizo Doctor-te ram danga chhuak awm tam thei lo mahse; Nurse-te erawh chhuak nasin Mizoram an ti hmingtha thin chu lawmawm a tih thu a sawi.

Trained Nurses' Association of India (TNAI) hi kum 1908 ah din a nih niin, Mizoram State Branch hi August 1964 ah din a nih a. Tun dinhmuah Mizoramah TNAI Life Member 4053 an awm mekin, District hrang hrangah TNAI Branch awm bawk a ni. 

Vawiina Kolasiba TNAI Golden Jubilee hmana ahhian Kolasib District chhunga Nurse hna Pension tawhte chawimawina hun hman a ni a. District Information & Public Relations Officer leh Mizoram Journalist Association, Kolasib District-te he hunah hian an tel bawk a ni.