2597/2024-2025

Dated Lawngtlai, 18th October 2024 : Vawiin khan Pu Cheemala Siva Gopal Reddy, IAS, District bawrhsap leh Horticulture Department hotute chuan R Vanhne leh Sihtlangpui rama huan tlawhna an nei.

Pu Cheemala Siva Gopal Reddy, IAS, chuan huan neitute thawhrimna leh taihmakna fakawm a tih thu a sawi a. Kut hnathawktute chu ei leh bara ram leh hnam  intodelh tura thawktu an nih angin, theihtawp chhuaha thawk zel turin a fuih a. An thlai chinte hlawk zawka an thar theihna turin Horticulture department - te nen thawhhona tha a awm a pawimawh tak zet tih tarlangin bawrhsap chuan thawhhona tha nei zel turin a chah nghal.

Pu Cheemala Siva Gopal Reddy chuan sawrkarin kut hnathawktute, a bik takin huan/Lo neitute  a ngaipawimawh hle tih tarlangin, sum leh paia tanpuina leh thlai chin dan tha inzirtirna kawng hrang hrangin a kalpui thin a, a hlawkna tak tak nei turin huan/ Lo neitute an pawimawh hle a ti. Mizoram sawrkarin a kalpui mek  'Bana Kaih'   tihhlawhtlin kawngah an pawimawh hle tih tarlangin, theihtawp chhuah zel turin a chah a. Huan enkawltute chu mamawh an neih ang ang leh huan thlai enkawl kawnga hriat duh an neihte Sawrkar department lama mithiam zawkte rawn nachang hre fo turin a chah a.  An thlai thar ang angte hlawk zawk leh man man zawka hralh tura duhsakna hlanin, District Administrator-  a nihna ang a  tanpui theihna kawnga  tanpui a inhuam reng thu a hrilh nghal bawk.

Vawiin 'Field Visit' ah hian R Vanhne rama Pu Runmanga leh Pu B. Bawithanga sawhthing hmun leh Sihtlangpui rama Pu Lalbiakdika huan  tlawh a ni a. Pu Runmanga hian sawhthing quintal -10 chingin, quintal-75 thar a inbeisei thu a sawi a, nikum khan quintal-45 a lo thar tawh nghe nghe a ni. Pu B. Bawithanga hian sawhthing quintal -15 a ching ve mek bawk.  Pu Lalbiakdika hian Balhla, Theihai, Tomato, Dragon fruit leh thlai dangte a ching a. Tun dinhmunah hian Theihai leh Balhla atang hian Value Addition hmangin thil siamchhuah a nei  mek a ni.

Lawngtlai bawrhsap hi Pu Dinesh Kumar Muhal, IAS,  SDC, Pu J.H. Zosiamliana , District Horticulture Officer leh a thawhpuite bakah  Pu Zonunchama Ralte, DIPRO, ten an tawiawm a ni.