2598/2024-2025

2024 Khuangchawi thla ni 18: Trained Nurses Association of India (TNAI), Lunglei District Branch chuan vawiin khan Convention Centre, Lungleiah TNAI Mizoram State Branch-in kum 60 a tlin (diamond jubilee) lawmna an buatsaih a, Lunglei South bialtu MLA Pu Lalramliana Papuia chuan Khuallian niin a hmanpui.

Khuallian Pu Lalramliana Papuia chuan trained nurse kal khawmte chu TNAI diamond jubilee lawmpuina chibai bukin, duhsakna a hlan a. Khawvela mi hnuaihnung ber aṭanga a lal ber thlenga kan mamawh inang tlang vek chu nurse-te enkawlna (nursing care) a ni tiin, nurse hna chu indona hmun thleng pawha service ṭul leh pawimawh a ni, a ti a. Mihringin kan mamawh ber leh kan tana hlu ber chu damna leh hriselna a ni tiin, nurse-te chu tisa lama damna leh hriselna min petu an nih avangin an hluin, an pawimawh hle a ni, a ti a. Nurse hna chu hna zahawm leh pawimawh tak a nih rualin a zahawmna vawng him turin thawktute an pawimawh tih sawiin, mi 99 fak tlak chanchin hi mi pakhat sawisel hlawhin a thai chhe thei a, nurse pakhat hming chhiatnain nurse zawng zawng a tihmingchhe tel thei tih hre reng chunga fimkhur leh inpekna thar nen hna thawk turin nurse kal khawmte chu a chah a. Kan mangan tawpa kan ban phak hnai bera awm chu nurse-te an nih angin hahdam taka miin an chatuan hmun an pan theihna tura mawh phurtu lian tak an ni tih sawiin, nurse-te chu rawngbawlna rilru pu chunga mi dang enkawl leh tihdam hna thawk sauh sauh turin a fuih a ni.

He hun hi Pi C. Lalrinpuii leh Pi Ramengmawii Pautu te'n kaihruaiin, Nursing School Lunglei leh School of Nursing (Christian Hospital Serkawn) Combined Choir te'n hawnna hla an sa a. Pi Vanthangpuii, Tutor (Rtd) chuan hunserh hmangin, TNAI Lunglei District Branch Chairman Pi T. Lalnipuii'n inlawmna thu a sawi a. Pi MC Vanlalrovi, National Awardee kaihhruaiin nurse pensioner, TNAI OB ni lai leh OB lo ni tawhte'n khawnvar chhiin, nurse kal khawm zawng zawngin nurse thutiam (Florence Nightingale's Pledge) an chham rual a. TNAI Lunglei District Branch Secretary Pi F. Lalneihthangi hnen aṭangin secretary report ngaihthlak niin, Treasurer Pi Vanlalthlengliani'n thupui thlan sa, "Nursing Excellence: Empathy, Expertise, Commitment" tih hmangin thu a sawi a. Jubilee Choir (Christian Hospital Serkawn) leh CHL-a Nursing Officer Pi Lalhlimpuii Fanai te hnen aṭangin zai ngaihthlak niin, School of Nursing CHS leh Nursing School Lunglei te'n lam an entir a. Jubilee Celebration Committee Chairman, NSL Principal Pi C. Rothangpuii'n lawm thu sawiin hun a khar a ni.

Lungleia TNAI Mizoram State Branch diamond jubilee lawmnaah hian Lunglei Municipal Council (LMC)-a executive councillor pahnih - Pu Zorinsanga Hmar leh Pi Lalhruaitluangi Sailo te, Ward IV Councillor Pu R. Lalramzauva te, sawm bik sawrkar official-te leh trained nurse leh student nurse-te an tel a ni.

TNAI hi India ram puma nurse intel khawm pawl niin, kum 1908-ah din a ni a. August 1964-ah Mizoram Branch hi District Branch angin din niin, Mizoram union territory a nih hnuah branch puitlingah pawm a ni a. Trained nurse-te tan TNAI life member leh Mizoram state branch member nih theih niin, member-te tan hian hamṭhatna hrang hrang ruahman a ni.

TNAI hi Lunglei District-ah hian Trained Nurses Association Mizoram (TNAM) tih hming puin kum 1998 khan din niin, kum 2003 November ni 18-ah TNAI Sub-Branch Lunglei District tiin thlak a ni a. Kum 2018 aṭangin District Branch angin kalpui a ni a. Tun dinhmunah TNAI Lunglei District Branch-ah hian member 200 chuang an awm mek a. TNAI Lunglei District Branch hian diamond jubilee lawmna hi October ni 25, 2024 (Zirtawpni) khian ruai nen buatsaih chhunzawm turin ruahmanna an siam a ni.