2455/2024-2025

Kolasib Dated the 10th October 2024 : October ni 9 atanga ni 11 thleng awh tur Mizoram Ranking Table Tennis Championship 2024 chu nimin chawhnu khan New Diakkawn Community Hall, Kolasibah Deputy Speaker Pu Lalfamkima chuan khuallian niin hawnna hun hmang.

He hunah hian Khuallian chuan Infiamna leh taksa sawizawi pawimawhna a sawi a. Infiamna kawnga hlawhtlinga; sang tak thleng tur chuan ruihhlo lakah fihlim a pawimawh thu leh zirna thlahthlam loh a tul thu a sawi bawk. Pu Lalfamkima chuan taksa hriselna chuan rilru hrisel a siamin ngaihtuahna a ti fim thin tih hre reng chungin, tunlai a thalai rual zinga rilru lam harsatna tam chho zel pawh insawizawina leh mahni in thununna nen huaisen takin a hneh theih a ni, a ti. He huna Table Tennis Championship nei tura kalkhawm infiammi te chu kawng engkimah midangte entawn tlaka nun hmang turin fuihna thu a chah a, an hma lam kawng zawh zel turah hlawhtlinna chang zel turin duhsakna a hlan nghal bawk.

Mizoram Table Tennis Association (MTTA) leh Kolasib District Table Tennis Association (KDTTA) te tangkawpin a buatsaih Mizoram Ranking Table Tennis Championship 2024 hawnna hun hi Pu R. Lalmalsawma, KDTTA President chuan a kaihruaia. Pu Lance Lalchhuanawma, Organizing Secretary, leh MTTA Joint Secretary ni bawk chuan he hunah hian Technical Report a pe a. Mizoram hmun hrang hrangin atangin Table Tennis Club 12 bakah District Association 3 te Mizoram Ranking Table Tennis Championship 2024 ah hian tel theiin, Player 88 te’n Category hrang hrangah intihsiakna an neih tur thu Report ngaihthlak a ni a. Pu R. Lalsangzuala, General Secretary, MTTA pawhin  Mizoram Table Tennis Association (MTTA) hmalakna leh hmachhawp awmte tarlanna hun a hmang bawk.