2456/2024-2025

Siaha the 10th October 2024: Deputy Commissioner’s Office, Siaha buatsaih ‘Right To Information Act (RTI) Week Observance’ chu vawiin khan DRDO Conference Hall, Siaha-ah hman a ni a, District Bawrhsap Pu VL Hruaizela Khiangte chuan Khuallian niin a hmanpui.

Khuallian Pu VL Hruaizela Khiangte chuan mipuite dikna chanvo pawimawh tak RTI chungchang inhrilhhriatna programme buatsaih a ni chu lawmawm a tih thu a sawi a. RTI chu Mipui ten Sawrkar atanga Information an duhte Dan ang taka an neih theihna chanvo a nih bakah sawrkar hnathawkte fimkhur phahna tur a ni a, India Ram Dan Pui Constitution-ah pawh Fundamental Right-a puan a nih thu a tarlang. Khuallian chuan RTI chu mi tihmualphona tur emaw phuba lakna tur a ni lo a, Sawrkar hna thawh tlangpui leh a hmalak tawhna te, hmabak leh hmachhawp an neihte mipuiin an hriatpui ve theih nana duan a ni a ti. RTI chu a tangkai em em rualin hman sual erawh a pawi hle thung a, sawrkar khalh ngil tu, official-te kalsual tur laka vengtu tha tak a nihna anga hman thiam a pawimawh a ti bawk. District Bawrhsap chuan a sawizelnaah RTI Act chuan Village Council te leh Local Council te pawh a huam tih tarlangin VC te fimkhur phah nan hmang se a ti a, document leh lehkha pawimawh vawn fel a pawimawh thu a sawi bawk. NGO kalkhawmte chu fuihin Sawrkar nen thawhhona tha tak an neih a ngai a ti a, kan hna thawh in ang vek kher lo mahse kan thawh chhan chu thuhmun a ni a, ram leh khawtlang tan, mipui thatna tura thawkho zel turin a fuih a, a tul changa finchhuah thin turin leh thahnemngai taka ke pen ho thin turin a fuih a ni.

Vawiin programme hi Addl DC Pu Abraham Beirazi khithie chuan a kaihruai a, DIPRO Pi K Ngosai chuan RTI Act 2005 leh The Mizoram RTI Rules 2010 hmangin presentation a pe a, SDO (S) Pu Vanlalchhuanliana chuan lawmthu sawiin hun tihtawp a ni. DC leh Addl DC te bakah, Siaha SP Pu KL Vulmawia te, Siaha khaw chhunga heade of office te, NGO aiawhte leh college zirlaite a tel a ni. RTI Observance Week hi kum tinin Oct Ni 5-12 a hman thin a ni.