Vawiin khan Aizawl East I bialtu MLA, Mizoram Legislative Assembly Deputy Speaker Pu R.Lalrinawma chuan a bial chhung Zemabawk, Zemabawk North, Sihphir, Sihphir Venghlun, Thuampui leh Zuangtui YMA te hnenah Oxygen Concentrator a sem.

Pu R.Lalrinawma chuan MLA Area Development Fund chu bial chhung veng hrang hrang mamawh intawm siam nana hman a nih thu leh kum 10 chhungin mamawh engemawzat lei leh thawh nia sawiin hmabak erawh tam tak a la awm thu a sawi a. Oxygen Concentrator chu damdawiin a awm kher lo, in lama enkawl zui ngai damlo Oxygen mamawh an pung chho zel niaa a lan avangin khaw lian deuh deuh paruka Branch YMA te hnenah mamawhte hman tangkai atan a pek thu a sawi a, a dang pawh a tul anga ngaihtuah zel tum a ni, a ti. MLA te chu ram leh hnam himna leh hmasawnna tura dan siama roreltu tura mipui thlan an ni a, ram rorelnaa Dan siamnaah an thawh hlawk em tih chu MLA tha tehna tur nia a hriat thu a sawi bawk.