Vawiin khan Agriculture Minister Pu KS Thanga, Aizawl South III bialtu MLA ni bawk  chuan Sailam leh Samlukhai khua te a tlawh a. Sailam khawdaia ramngaw chhungah Sava ngainatute leh Sava humhalhtute puala Riahbuk, Sailam Ecological Conservation Society(SECS) ten an sak, Sailam Birders' Cottage a hawng a; Samlukhai khuaah hian MLA Fund hmanga sak, vantlang In te a hawng bawk a ni.

Sailam Birders' Cottage hawngtu, Agriculture Minister Pu KS Thanga chuan nungchate an hlut thu a sawi a. "Ram hmasawn zelin  kan khawtlangah khawtlang mipuite zingah leh khawtlang hruaitute zingah thlengin mahni hualveltu ram thiatdarh vek duh te kan lo pung zela vawiin niah chuan kan Ram a lo bua ta hle mai. Pathian, Mizo anga min siamtu, hnam anga min dintu hian kan pualin ramdang min pe dawn tawh lova. Hawh u kan ram neihchhun hi i humhim ang u, i duat ang u", a ti. Zoramah sava hram mawi tak te pawh hriat tur a vang tan tawh ti a sawiin achhan chu kan kawng tinrengin eitur atan kan suat a, kan eitur mah ni se, Tur hmang  thlengin kan hrai duh chu mahni tura inhrai kan ni a ti a. Nungchate kohkir leh nan tan kan lak a hun tih a sawi. "Tunlaia kan miliante intihhmuh Telescope te nena sava te hi mipui ten kan do ngam leh kan huat ngam a ngai a, sava suat rem tute an ni. An ni hian khawngaih takin an thil tih hi a tha lo a ni tih an hriat kan duh a. Sim turin ka ngen a ni", a ti.

Rannung mai ni lo,  hlo leh zuva thah nan thlenga tur chelek kan lo uar ta lutuk chu thil hlauhawm tak a niba. Zuk leh hmuam ti miah lo cancer vei an pun chhanah zirtu tam tak chuan tur kan chelek lutuk hi an puhmawh tawh a ni a ti.  Pu KS Thanga chuan Nungcha humhalh kawngah mipui kan harh thar a ngai tih sawiin nungcha humhalh leh ramngaw venhim kawnga  Sailam khaw mipuite  leh SECS tihdan chu midangte pawn an entawn a ngai a ni a ti. Sailam khaw mipui te pawh an hmalaknate rawn phurpuitu mikhualte chungah that chhuah zel turin a chah a, an hmalakna chu EcoTourism atan pawh hmahruaitu a ni a ti.

Sailam Birders' Cottage  hi MLA LADS Works hnuaia Rs 1,00,000/- leh mi thahnemngai leh khawchhungmi te thawhkhawm Rs 3,55,00/- sak a ni a. Bialtu MLA chuan vawiin khan cottage dang pakhat sak bul tan nan Rs. 1,00,000 SECS hnenah a hlan ve nghal bawk a ni. Mi 4 riah theihna tur niin Sava humhalhtute, nungcha thlatute, Sava lam zirmi mithiamte, khualzinmite leh Camera nena Sava vehtute tan riah theihna leh khualbuk a ni. Sailam ramngaw chhungah hian mithiamte chhutdan chuan Sava chihrang 200 chuang zet an awm a ni.