Vawiin khan Mizoram State Legal Service Authority (MSLSA) buatsaihin Lunglei District media mi te tana Dan zirhona hun ‘Seminar on Access to Justice’ chu MJA Press Club, Lungleiah neih a ni. He hunah hian MSLSA hotute, I&PR official-te leh Lunglei District media mi thahnem tak an kalkhawm.

Hawnna hun Pu Vanlalenmawia, Member Secretary, MSLSA kaihhruaiah Pu C. Lalthanmawia, SP, Lunglei District chuan Media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. Uluk leh fimkhur taka thu ziak thin tur leh an thuchhuah tur chu thudik a ni em tih finfiah hmasa thin turin a chah bawk.  Khawvelin Journalist te hi a ngai pawimawhin a ngai hlu em em a, 'The Fourth Estate' tih hiala koh niin kan ram inrelbawlna Democracy vawngnung zel turin an pawimawh takzet a ni tiin Seminar-a tel zawng zawng te duhsakna a hlan a ni.

Pu H. Lalthansanga, Lunglei District MJA President pawhin thu sawiin Mizoram State Legal Service Authority-in Lunglei District media mi te tana Dan zirhona hun tha tak an buatsaih sak avangin an chungah lawmthu a sawi a. MJA Lunglei Disitrct hmalakna hrang hrang te tarlangin  ram leh hnam, District hmasawnna turin ke pen chhunzawm zel an tum thu a sawi.

Vawiin Seminar on Access to Justice ah hian Pu Johny L Tochhawng, Advocate-in ‘Crminal Case leh a kaihhnawih’ tih thupui hmangin zirtrina pein, Pu F. Lalthlamuana, DSP (Crime) in ‘Cyber Crime awmzia leh fimkhur tulna te’ tih thupui hmangin zirtirna a pe a. Pi Lalfamkimi, Advocate in ‘POCSO Act 2012’ chungchangah zirtirna pein Pu Malsawmdawngliana, APP in ‘The Mizo Marriage, Divorce and Inheritance of Property Act’ chungchangah zirtirna a pe bawk. Zawhna leh chhanna leh sawihona hun tha tak hman ho niin Pu Andrew Lalhruaitluanga, Secretary, Lunglei DLSA in lawmthu sawina hun a hmang bawk.