Vawiin khan I&PR Conference Hall Kolasib ah nu nau pai te tana Sawrkar Laipui in hmathatna a siam pradhan mantri matru vandana yojana (pmmvy) week kharna hun hman a ni.

Kharna inkhawma khuallian Pu Lalnunhlua, Project Director, DRDA chuan Sawrkar Laipui ina scheme tam tak a ruahman zinga hriselna kawnga scheme pawimawh tak PMMVY chu a dawngtu (beneficiary) te tan chuan hlawkna hlir  ani tiin Sawrkar in tanpuina hi ruahman lo mahse hmeichhia te chuan nau an pai in, an hringa an enkawl tho a, chutiang kara a thlawn liau liaua tanpuina ruahman a ni chu nu tan chauh nilo a nau pai lai tan pawh hriselna kawnga puitu thatak anih a beisei thu a sawi bawk. Hetih lai hian mipuiten Sawrkar Scheme hrang hrang kalphung leh hamthatna dawn theih dan kalhmang te chu zau zawka inhrilhhriatna leh inzirtirna a pawimawh thu a tarlang bawk a ni.

PMMVY hi Fatir/ Fa hmasaber pai te ina hamthatna pawisa fai cheng 5000/- an dawn theihna scheme a ni a, chutih laiin Sawrkar hnathawk nghet emaw nau neih senso hmuhlet leh theihna (Medical Re-imbursement) nei te leh kum 19 hnuailam te a huamlo a, Mizoramah hian Social welfare Department in he Scheme hi a kalpui a ni.

He Scheme diltu leh a pasal ten Aadhar emaw Voter ID emaw Sawrkar hriatpui ID an neih ngei ngei a ngai a, nu hian ama hming ngeiin bank Account  a neih a ngai bawk a ni. Hamthatna hi installment thum (3) a pek ani a 1st installment: nau pai tan tirh atanga ni 150 chhungin cheng 1000/-, 2nd installment: naupai atanga thla 6 hnu ah cheng 2000/-, 3rd :installment nau a pian atanga thla 3 hnu ah cheng 2000/- dil tur ani a, nu hian vaccine hrang hrang a lak kim a ngai bawk. 

Tun dinhmunah Kolasib District chhungah beneficiaries 562 awmin pawisa cheng 21,25,000/- chu hamthatna dawngtu te sum bawm (Bank Account) ah khungsak tawh an ni.