Vawiin khan Sihphir High School ah MLA fund hmanga sak Basketball Court hawnna hun hman a ni a, Deputy Speaker Pu R.Lalrinawma, bialtu MLA chu Khuallian niin Sihphir High school leh Higher Secondary school hotute, Sihphir khawtlang leh NGO hrang hrang hruaitute leh school naupangten he hun hi an hmanpui.

Deputy Speaker Pu R.Lalrinawma chuan Infiamna hi kan taksa hrisel nan a tangkai mai bakah ruihlo laka kan fihlim nan leh hunawl kan hnawhkhahna hmanraw pawimawh tak ani a, Infiamna mual buatsaihna kawnga Sawrkar hmalakna hrang hrang avangin inkhela eizawng Mizo thalai kan pung chho mek zel a ni, a ti a, heng kan Mizo thalai infiamna a fehchhuakte hian kan ram hming an ti tha zel a, an hlawhtlinna hmang hian kan ram tan rawngbawlna ropui tak an thawk tel zel bawk a ni, a ti. Pu R.Lalrinawma chuan Zirlai naupangte chu Infiamna mual sak thar te tangkai taka hmang turin a chah a, MLA fund hmanga Basketball Court tha tak sak puitlin ani thei chu lawmawm a tih thu a sawi bawk.

Hawnna programme hi Pu H.V.L Zarzoliana, VCP in a kaihhruaia, Pu Lalrinliana Royte hnen atangin Technical report ngaihthlak niin Pu JK Das, Headmaster Sihphir High School leh Pu Lalrinawma, Headmaster Sihphir Higher Secondary school ten thusawina hun an hmang a, Sihphir Basketball Club atangin team pahnih ten Friendly match an khel nghal bawk.

Basketball Court hi 31.7 m a thui leh 16.7 m a zau a ni a, Ni 18 June 2018 ah hna thawh tan niin Ni 21 september 2018 ah thawh zawh a ni. He basketball court ah hian Fibre board hman a ni a, a sak zawh nan a senso zawng zawng chu Rs. 750000 a ni.