Pu John Rotluangliana, Deputy Speaker chuan a bialchhung Lengpui khua a neih Tlangnuam RD Block PYKKA Sports nithum chhung awh tur chu nimin ni 10.8.2011 khan a hawng. Tlangnuam RD Block huamchhungah hian khaw 13 awmin he PYKKA Sports ah hian khaw 12 atangin infiammi thahnem tak an tel a ni.

Hawnna inkhawm Lengpui playground a neih a ni a. Sports hawnna neih pah a thu sawiin Pu Johna chuan tuna thangthar awm mekte chu generation vannei an nih thu a sawi a, an hma deuha piangte chuan ruihhlo avanga chhawk tlak loh leh mual liam ta tam tak an awm a ni, a ti. A sawi zelnaah thalai thaza tak takte tun sorkar-in infiamna tur hmunhma leh hmanruate a ngaihtuah zel a, tunah hian Rajiv Gandhi Stadium sak mek anih bakah Lammual chu artificial turf phah a ni tawh a. District hrang hrangah infiamna tur hmun buatsaih mek a ni a. Lengpuiah pawh Mini Sports Complex dinna tur sorkar laipuiin cheng vaibelchhe li chuang a ruahman tawh a ni, a ti.

Pu Johna chuan infiam hi a thei leh thiam bik an awm rualin hrat lak avang pawhin a hlawhtlinpui theih thu a sawi a. Amaherawh chu chutianga hlawhtlinna nei tur chuan ruihhlo laka inthiar fihlim leh tum ruh a pawimawh thu a sawi. Mizote hi infiamna hrang hrangah kan zei thu sawiin, infiammi kalkhawmte chu hlawhting tura chhel tak leh tih takzeta bei turin a fuih a ni.