Art & Culture Minister Pu P.C. Zoram Sangliana medical check tura kal chuan vawiin khan Kolkata a Mizoram House ah Raja Rammohan Roy Library Foundation (RRRLF) hotute  chuan inkawmna hun an nei a.

RRRLF Director K.K. Banerjee chuan Mizoram hmun hrang hranga Rural Library 25 thlan fel tawhte kumin chhunga sakna tur pawisa Rs. 135 lakhs (Central Fund) a rang thei ang ber a Art & Culture Directorate kaltlang a sum release a nih tur thu Minister hi a hrilh a. Serchhip leh Mamit District Library sakna tur atan proposal thehluh tawh chu lo enfel hnuah a rang thei ang ber a sanction a nih tur thu Director hian a hrilh bawk a ni.

Minister hi Senior Liaison officer, Kolkata leh Assistant Liaison officer ten an tawiawm a ni.