Vawiin khan I&PR Conference Hall, Mamit-ah Health & Family Welfare, Mamit District chuan 1^st Quarter Review meeting an nei.

He meeting Dr. Vanlalfela, Senior Medical Officer, Mamit kaihhruaiah hian Health & Family Welfare Department, Mamit District hmalakna te thlirho niin hmasawnna tur awmte sawiho nghal a ni a. Vanlalhriatpuii Renthlei, District Programme Manager, NRHM Mamit chuan hmasawnna 2010 - 2012 chhunga mite leh 1^st Quarter huam chhunga mi powerpoint presentation hmangin a entir a ni. Hmalakna tarlana a lan danin April 2011 atang June 2011 chhung hian naupiang 366 awmin Damdawi Ina naupiang 184 an ni a, mahni In a nau nei 182 an awm bawk. Thisa a naupiang 3 an awm bawk a ni. Naute, kum 1 hnuailam thi 5 niin Nu insiamzat 10 an awm a, malaria chungchangah thisen exam zat 8615 niin positive 488 a ni a, hetih lai hian malaria avanga thi 1 a awm a ni.

He 1^st Quarter Review Meeting-ah hian hmasawn leh zualna turte sawiho niin damdawiina nau nei, tun aia an tam theih dan turte, loh theih loh avanga In lama nau neite pawh mithiamte kuta nei tura zirtirna pek uar a tulzia te tarlan a ni bawk. Naute kum 1 hnuai lam thi an tlem lehzual theih nana Damdawi In ngeia nau nei tur leh naupai laia in enkawl ngun a, in check-up pawimawhzia zirtir uar turin thawktute an pawimawhzia tarlan a ni bawk.

He meeting ah hian District Hospital, CHC, PHC atangin Doctor, Nursing Superintendent, Health Supervisor leh Sub-Centre 30 atangin Health Worker pakhat theuh an tel a ni.